COVID-19: Eki bank Qazaqstanǵa 1,5 mlrd eýro qaryz bóledi

NUR-SULTAN. QazAqparat – Senattyń jalpy otyrysynda «Qazaqstan men Azııa damý banki arasyndaǵy Qaryz týraly kelisimdi ratıfıkatsııalaý týraly» Zańy jáne «Qazaqstan men Azııa ınfraqurylymdyq ınvestıtsııalar banki arasyndaǵy Qaryz týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Sizderdiń qaraýyńyzǵa eki zań jobasy usynylyp otyr. Bul kelisimderge Qazaqstan Respýblıkasy Prezıdentiniń 2020 jylǵy 13 tamyzdaǵy №385 jáne №386 Jarlyqtaryna sáıkes qol qoıyldy», - dedi QR Qarjy mınıstri Erulan Jamaýbaev.

Qazaqstan Respýblıkasy men Azııa damý banki arasyndaǵy 908 mln 596 myń eýro somasyndaǵy jáne Azııa ınfraqurylymdyq ınvestıtsııalar banki arasyndaǵy 661 mln 800 myń eýro somasyndaǵy Qaryz týraly kelisimderge qol qoıyldy. Qaryzdar 2021 jylǵa arnalǵan bıýdjet tapshylyǵyn qarjylandyrýǵa baǵyttalatyn bolady. ıAǵnı COVID-19 pandemııasynyń saldarymen kúres jáne ekonomıkany qalpyna keltirý boıynsha Qazaqstan Respýblıkasy Úkimetiniń sharalaryn qoldaýǵa múmkindik beredi.

«Azııa damý bankiniń qaryzy óteý merzimine qatysty eki bólikke bólingen. 454 mln 298 myń eýro somasyndaǵy qaryzdyń bir bóligi, ıaǵnı jartysy 3 jyldyq jeńildik kezeńdi qosa alǵanda, 10 jyl merzimge beriledi. Al qalǵan 454 mln. 298 myń eýro somasyndaǵy ekinshi jartysy 3 jyldyq jeńildik kezeńdi qosa alǵanda, 5 jyl merzimge beriledi. Syıaqy mólsherlemesi ‒ Eýrıbor+0,50%», - dep naqtylady mınıstr.

Budan bólek, Azııa ınfraqurylymdyq ınvestıtsııalar bankiniń qaryzy 3 jyldyq jeńildikti kezeńdi qosa alǵanda, 10 jyl óteý merzimine beriledi. Syıaqy mólsherlemesi ‒ Eýrıbor+0,50%.

«Kelisimderde belgilengen qarjylyq sharttarǵa sáıkes qaryzdarǵa qyzmet kórsetýdi jáne ony óteýdi respýblıkalyq bıýdjet qarajaty esebinen júzege asyratyn bolady. Bul qarajat Azııa damý bankiniń jáne Azııa ınfraqurylymdyq ınvestıtsııalar bankiniń pandemııaǵa qarsy kúres jónindegi arnaıy baǵdarlamalary aıasynda Qazaqstan Respýblıkasy úshin rezervtelgen», - dedi E. Jamaýbaev.