Covid-19: 5 qańtardan bastap jekelegen obektilerdiń qyzmetine engiziletin jańa shekteýler kúshine enedi

NUR-SULTAN. QazAqparat - 5 qańtarynan bastap Covid-19 koronavırýs ınfektsııasynyń taralýynyń aldyn alý boıynsha qosymsha sharalar sheńberinde jekelegen obektilerdiń qyzmetine engiziletin jańa shekteýler kúshine enedi, dep habarlaıdy Covid-19 taralýyna jol bermeý jónindegi VAK baspasóz qyzmeti.

Qazaqstan Respýblıkasynyń Bas memlekettik sanıtarlyq dárigeriniń qaýlysymen jumys jáne demalys kúnderinde saýda jáne oıyn-saýyq ortalyqtaryna, saýda úılerine, saýda jelilerine (azyq-túlik emes), saýda jelilerine (saýda alańy 6000 sharshy metrden astam), karaokege kirýge jumys rejımi shektelmeı, qyzmetkerler men kelýshilerde qaýipsiz «jasyl» mártebe (vaktsınatsııa, synama alynǵan sátten bastap 7 kúnnen aspaıtyn teris nátıjesi bar PTR testi, turaqty medıtsınalyq qarsy kórsetilimderi bar, sońǵy 3 aı ishinde aýyryp saýyqqan adamdar) bolǵan jaǵdaıda ruqsat etiledi.

Qabyldanǵan sharalar koronavırýstyń «Omıkron» túriniń taralý jáne juǵý jyldamdyǵyna negizdelgen, ol qazirdiń ózinde álemniń 110 elinde anyqtaldy, al 30 qarashada ol nebári 10 elde anyqtalǵan bolatyn.

«Omıkron» túriniń taralýy birqatar elderdiń densaýlyq saqtaý júıesiniń shamadan tys júktelýin týdyrýda. Osyǵan baılanysty qabyldanyp otyrǵan sharalar epıdemıologııalyq jaǵdaıdyń turaqtylyǵyn saqtaýǵa, aýrýlar sanynyń ósý qaýpin azaıtýǵa, neǵurlym qatań shekteý sharalaryn engizýge jol bermeýge baǵyttalǵan.

Koronavırýstyń bul túriniń juqpalylyǵy «Delta» nusqasyna qaraǵanda 5 ese joǵary ekenin este saqtaý kerek, qaıta juqtyrý qaýpi joǵary. Dúnıejúzilik densaýlyq saqtaý uıymynyń boljamy boıynsha aýrý birneshe aıdyń ishinde búkil álemge taralýy múmkin.