CQO-da ekologııaǵa zııan keltirgen 3 nysannyń jumysy toqtatyldy
SQO óńirlik kommýnıkatsııalar qyzmetinde ekologııa departamentiniń basshysy Azamat Bektasov atqarylǵan jumys jaıynda esep berdi.
Departament jetekshisiniń aıtýynsha, jyl basynan 21 tekseris uıymdastyryldy. Onyń 9-y profılaktıkalyq sıpatta nysanǵa barý arqyly, 11-i jospardan tys jáne bireýi biliktilik talabyna sáıkestigin anyqtaý úshin júrgizildi. Nátıjesinde 80 zań buzýshylyq anyqtaldy, sonyń 78-ine olqylyqtardy joıý týraly uıǵarym berildi.
«Jarty jyldyń ishinde departament qorshaǵan ortaǵa keltirilgen shyǵyndy óteýge 10 talap joldady. Shyǵyn somasy 11 mln teńgeden asady. Segizi boıynsha 10,5 mln teńge tólendi. Ekeýi boıynsha erikti tólem merzimi áli bitken joq.
Ekologııalyq zańnamany buza otyryp jumys istegen 4 sharýashylyq nysanyna qatysty is sotqa joldandy. «Beskól qus fabrıkasy», «Qyzyljar sý» jáne «Zenchenko jáne K» JShS nysandary olqylyqty joıǵansha jumysyn toqtatty. Al «Severnyı Potok SK» JShS boıynsha is áli sotta jatyr», - deıdi Azamat Bektasov.
Budan basqa 16 ákimshilik hattama toltyrylyp, sonyń 14-i boıynsha shamamen 1,5 mln teńge sotqa jetpeı óndirilip alyndy.
Maýsym aıynda ekologtar polıtsııa qyzmetimen birge qoǵamdyq kólikterdi tekserdi. Departamenttiń synaq zerthanasynyń mamandary dızel otynymen jumys isteıtin 6 shaǵyn avtobýsqa ólsheý júrgizdi. 5 kólikte tútindeý mólsheri 5 jáne odan da kóp ese asqan. Barlyq shaǵyn avtobýstar 2013 jyldan 2018 jylǵa deıin Qytaıda shyǵarylǵan. Polıtsııa qyzmetkerleri qorshaǵan ortany lastaǵan kólik júrgizýshilerin ákimshilik jaýapkershilikke tartty.
