Tsıfrlyq damý mınıstri baılanys operatorlaryna salynǵan aıyppul týraly aıtty

ASTANA. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın sapasyz ınternet boıynsha baılanys operatorlaryna salynǵan aıyppul eselep óskenin aıtty, dep habarlaıdy QazAqparat tilshisi.

«Jyl basynan beri, ıaǵnı jańa aıyppuldar engizilmeı turǵanda, qyrkúıekke deıin 700-ge jýyq tekserý boldy. Osy oraıda 180 mıllıon teńge aıyppul salyndy. Qyrkúıek aıynan bastap aıyppul somasy edáýir ósti. Buryn ekinshi qaıtalap talaptardy buzǵany úshin aıyppul 150 AEK bolsa, qazir 1500 AEK-ke jetti. Qyrkúıek aıynan beri qazirge deıin 300-ge jýyq tekserý júrgizilip, 300 mıllıon teńge shamasynda aıyppul salyndy», - dedi B.Mýsın Senattyń jalpy otyrysynan keıingi baspasóz máslıhatynda.

Onyń aıtýynsha, bul baǵytta qadaǵalaý kúsheıtilmek, sondaı-aq zańnamalyq bastamalar usynylatyn bolady.

Budan buryn habarlanǵandaı, Qazaqstandaǵy uıaly baılanys naryǵyna jańa operator qosylýy múmkin.