Tsıfrlandyrýdan habary bar emdelýshiler úıden shyqpaı-aq birneshe qyzmetti ala alady
«Medıtsınalyq qyzmetkerlerdiń kompıýterlik saýattylyǵy men halyqtyń tsıfrlyq densaýlyq saqtaý múmkindikterin meńgerýi boıynsha másele joq emes. Atalǵan máseleni sheshý úshin tyń tehnologııalardy engizý boıynsha kelisimderdi jasaý kezinde ákimdikter medıtsınalyq qyzmetkerlerdi aqparattyq júıe boıynsha oqytý máselesine mán berýi kerek», - deıdi Alekseı Tsoı.
Vıtse-mınıstrdiń aıtýynsha, densaýlyq saqtaý mınıstrligi aldaǵy ýaqytta elekrondy densaýlyq saqtaý ortalyǵynyń kúshimen medıtsına qyzmetkerlerin kezeń-kezeń boıynsha oqytýdy kózdep otyr.
«Tsıfrlyq densaýlyq saqtaýdyń múmkindikterin halyqqa túsindirý úshin tórt óńirde pılottyq joba retinde josparlar ázirlenip, oǵan sáıkes densaýlyq saqtaý salasynyń elektrondy qyzmetteriniń múmkindikterin nasıhattaý júrgizilýde. Bul máselelerdiń sheshimi kelesi múmkindikterge qol jetkizýge jol ashady: elektrondy qujattyń arqasynda dárigerler naýqastyń naqty jaǵdaıy qandaı ekenin anyqtaı alady; Polıklınıkalardaǵy kezek azaıady; Ýchaskelik dárigerlerge barý qajettiligi úshten birge tómendeıdi», - deıdi ol.
Alekseı Tsoıdyń sózine sensek, patsıentter úıden shyqpaı-aq, dárigerdiń keńesin, dárilerdiń retseptin, aýrýhana anyqtamasyn, dárigerge qaralǵannan keıingi qorytyndyny ala alady.
«Ásirese, bul alys aýyldaǵy halyq úshin asa yńǵaıly. Patsıentter onlaın-monıtorıng arqyly óziniń densaýlyǵyna, ásirese sozylmaly aýrýǵa shaldyqqan naýqastar óz jaı-kúıine basa mán bere bastaıdy», - dep túıdi Alekseı Tsoı.