«Tsıfrǵa» kóshý ekonomıkanyń kóptegen sektoryn túbegeıli ózgertedi - ekonomıst
Ulttyq ýnıversıtet janyndaǵy Ekonomıka jáne Bıznes joǵary mektebi fakýltetinde «Tsıfrly ekonomıka - strategııasy men júzege asyrý mehanızmderi» taqyrybynda dóńgelek ústel ótti.
Jıynda «Tsıfrlyq Qazaqstan» memlekettik baǵdarlamasyn júzege asyrý boıynsha ekonomıkanyń aspektileri jan-jaqty talqylandy. Jıynda basty baıandama jasaǵan ekonomıka ǵylymdarynyń doktory Saıabek Táttibekuly tsıfrly format ekonomıkanyń kóptegen sektoryn túbegeıli ózgertetinin aıtty.
«Eger tsıfrlandyrýdyń aldyńǵy kezeńi mıllıondaǵan tutynýshylardyń Internetke qol jetimdiligin keńeıtýmen sıpattalsa, al jańa kezeń- tsıfrlyq qyzmetterdiń, ónimder men júıelerdiń keń spektrin kıber-fızıkalyq júıege biriktirýmen erekshelenedi. «Tsıfrǵa» kóshý - ekonomıkanyń kóptegen sektorlaryn túbegeıli ózgertedi. Shyn máninde, búgin de barlyq salalardy tsıfrlandyrý úrdisi júrip jatyr», - dedi Ekonomıkalyq zertteý ortalyǵynyń basshysy Saıabek Táttibekuly.
Jas ǵalym Aıjan Ótegen krıptovalıýtany retteıtin memlekettik mehanızmder tez arada iske qosylý qajettigin aıtty.
«Halyqtyń krıptovalıýtaǵa qyzyǵýshylyǵy kún ótken saıyn artýda, saýatsyzdyqtan kóp adam aldanyp qalyp jatyr. Sony retteıtin memlekettik mehanızmder tez arada iske qosylýy tıis»,- dedi Aıjan Ótegen.
Ol sóz sózinde, sońǵy ýaqytta qalyptasyp kele jatqan tsıfrlyq mádenıet pen blokcheın tehnologııalarynyń mańyzdylyǵyn paıymdap, halyqaralyq valıýtany krıptovalıýtada qurýdyń qajettiligin atap ótti.
Onyń pikirinshe, agroónerkásiptik keshendegi aýylsharýashylyǵyn tsıfrly tehnologııalarmen qamtamasyz etý búgingi zaman talaby. Baıandamashy Ardana Barbosyn óz sózinde agroónerkásiptik keshendegi álemdik tendentsııalarǵatoqtaldy:
«Tsıfrlyq tehnologııalardy jappaı engizý, ónimdiliktiń ósýin qamtamasyz etý, olardyń básekege qabilettiligin, drondar men sensorly topyraqty paıdalaný, ferma robottary men analıtıkalyq blokcheın platformalardyengizý aýyl sharýashylyǵyn damytýǵa serpin beredi. Osylaısha, tsıfrlandyrý nátıjesinde shıkizat salasynda da, agoónerkásiptik keshende de syrtqy naryqtarǵa otandyq eksporttyń ósýi qamtamasyz etiletin bolady, bul óz kezeginde iri óndiristik kompanııalardy kapıtaldandyrýdyń ósýine ákeledi»,- dedi ol.
Dóńgelek ústeldi qorytyndylaǵan jas ǵalym Ph.D doktory Raıgúl Dosjan ekonomıkalyq zertteý ortalyǵynda daıyndalyp jatqan «Tsıfrly ekonomıkany ártaraptandyrý» degen oqýlyqtyń jaqyn arada stýdentter men magıstrant, doktoranttarǵa usynylatynyn habarlady.