Chrysler tirkemedegi aqaýlarǵa baılanysty kólikterin keri qaıtaryp jatyr

ASTANA. KAZINFORM — Chrysler kompanııasy tirkemeni súıreý modýlderinde bolýy múmkin aqaýlarǵa baılanysty 450 myńnan astam avtokólikti keri qaıtaryp alatynyn málimdedi. Bul týraly CBS News jazdy.

AQSh-tyń Jol qozǵalysy qaýipsizdigi jónindegi ulttyq basqarmasynyń (NHTSA) málimetinshe, konstrýktsııalyq kemshilikter saldarynan tirkemeniń jaryq shamdary jumys istemeı qalýy jáne onyń tejegish júıesi isten shyǵýy múmkin.

Keri qaıtaryp alý naýqanyna 2024–2026 jyldary shyǵarylǵan Jeep Wagoneer S modelderi, sondaı-aq 2025–2026 modeldik jyldarǵa jatatyn Ram 1500, 2500, 3500 avtokólikteri, onyń ishinde Cab Chassis nusqalary da kirdi. Sonymen qatar tizimge 2026 jyly shyǵarylǵan Jeep Cherokee modeli engizilgen.

NHTSA ókilderi Chrysler dılerleri aqaýly tirkemeni basqarý modýlin tegin aýystyratynyn naqtylady. Avtokólik ıelerine resmı habarlamalar 24 naýryzda jiberiledi dep josparlanyp otyr.

Sondaı-aq federaldyq agenttik Mopar markaly keıbir tirkemeni súıreý modýlderin de keri qaıtaryp alý týraly habarlady, óıtkeni olarda da osyndaı aqaýlar bolýy múmkin. Eger mundaı modýl avtokólikke ornatylǵan bolsa, dılerler ony tegin aýystyrady, al eger ornatylmaǵan bolsa — modýldi ıelerinen satyp alady. Bul baǵdarlama boıynsha habarlamalardy 2026 jylǵy 24 naýryzda jiberý josparlanǵan.

Buǵan deıin Nissan kompanııasy esik shekteýishteriniń sapasyz dánekerlenýine baılanysty 26 432 avtokólikti keri qaıtaryp alatyny habarlanǵan bolatyn. Atalǵan aqaý jol-kólik oqıǵalary men jaraqat alý qaýpin arttyrýy múmkin.