Chempıondar lıgasy: «Qaırat» alǵashqy kezdesýinde «Sportıngke» ese jiberdi

ASTANA. KAZINFORM - Fýtboldan UEFA Chempıondar lıgasy negizgi kezeńindegi alǵashqy oıynda «Qaırat» Portýgalııanyń «Sportıng» komandasyna ese jiberdi

Kezdesý barysynda jankúıerler «Qaırat» qaqpashysy Sherhan Qalmyrzany oıynyna nazar aýdardy. Óıtkeni, olar negizgi qaqpashy Aleksandr Zarýtskıı men Temirlan Anarbekovtiń jaraqat alyp qalýyna baılanysty Portýgalııaǵa attandy. Ol búgin alǵashqy mınýttan jasyl alańǵa shyqty. Otandasymyz osylaısha UEFA Chempıondar lıgasy tarıhyndaǵy eń jas qaqpashylar úzdigine endi. Ol dúnıege kelgenine 18 jas, 3 aı, 3 kún ótkende jasyl alańǵa shyǵyp otyr. 

Birinshi kezeńde Sherhan ózine senimdi oıyn kórsetti. Birinshi kezeńde 21-mınýtta portýgalııalyq klýbtan Morten ıÝlman tepken dopty keıin qaıtarsa, odan keıin de birneshe soqqyǵa tosqaýyl qoıdy.

Al 44-mınýtta «Sportıng» sapynan Fransıský Trınkan esep ashty.

Ekinshi kezeńde qazaqstandyq komanda jıi qatelikke boı aldyrdy. Saldarynan nebári tórt mınýtta qaqpaǵa úsh gol jiberip aldy. Aldymen Fransıský Trınkan 64-mınýtta taǵy bir márte mergendik tanytsa, odan keıin Alısson Santos 66, Jeovanı Kenda 68'-mınýtta qaqpany dál kózdedi.

Oıynnyń 86-mınýtynda «Qaırat» sapynan Edmılson bir golmen jaýap qaıyrdy.
Osylaısha qazaqstandyq komanda qarsylasyna 1:4 esebimen jeńilip qaldy.

Endi almatylyq klýb aldaǵy oıynyn 30 qyrkúıekte Almatyda Ispanııanyń «Real Madrıd» komandasyna qarsy ótkizedi. 

Sondaı-aq olar bedeldi týrnırde «Inter» (Italııa), «Arsenal» (Anglııa), «Brıýgge» (Belgııa), «Olımpıakos» (Grekııa), «Pafos» (Kıpr), «Kopengagen» (Danııa) klýbtarymen oınaıdy.

Qazaqstandyq komanda dop dodasynda barlyǵy 8 oıyn ótkizedi. Onyń 4-eýi óz alańynda bolsa, 4-eýi syrt alańǵa josparlanǵan.