«Qaırat» «Arsenalmen» kezdesýde sensatsııa jasaýǵa jaqyn qaldy

ASTANA. KAZINFORM — Qazaqstandyq «Qaırat» UEFA Chempıondar lıgasy negizgi kezeńiniń segizinshi týrynda Anglııanyń «Arsenal» (London) komandasyna ese jiberdi.

Qazaqstandyq jankúıerler bul kezdesýdi asyǵa kútti. «Arsenal» álemdegi eń bedeldi klýbtyń biri retinde baǵalanady. Sondyqtan olardyń kókeıinde almatylyq klýb azýly qarsylasyna qalaı tótep bere alady degen saýaldyń bolǵany ras.

«Qaırat» alǵashqy mınýttan tolassyz shabýylǵa toıtarys berýge tyrysty. Degenmen anglııalyq komanda jyldam gol soǵý múmkindigin izdedi. Nátıjesinde olardyń qatarynan Vıktor Dekeresh 2-mınýtta kózdegen nysanadan múlt ketken joq.

Oıynnyń 7-mınýtynda almatylyq klýb tarazy basyn teńestirýge múmkindik aldy. «Qaırat» shabýylshysy Jorjınony londondyq komanda qorǵaýshylary óz alańynda shalyp jyqqan edi. Onyń ózi penaltıdi múltiksiz oryndaı bildi. 

Odan keıin londondyq klýbtan Kaı Haverts 15, Gabrıel Martınellı 33-mınýtta mergendik tanytyp, basymdyqty arttyra tústi.

Ekinshi kezeńde de anglııalyq klýb oıyn tizginin óz qolynda ustaýǵa tyrysty. Dese de oǵan «Qaırat» laıyqty toıtarys berip jatty. Esesine 93-mınýtta qazaqstandyq komandadan Rıkardıno esep aıyrmasyn qysqartty.

Osylaısha almatylyq klýb qarsylasyna 2:3 esebimen ese jiberdi.

Osyǵan deıin negizgi kezeńde «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4 esebimen jol berse, Kıprdiń «Pafosymen» 0:0 esebimen teń tústi.

Aǵylshyndyq komanda jarys barysynda Ispanııanyń «Atletık Bılbao» (2:0), Grekııanyń «Olımpıakos» (2:0), Ispanııanyń «Atletıko Madrıd» (4:0), Chehııanyń «Slavııa» (3:0), Germanııanyń «Bavarııa» (3:1), Belgııanyń «Brıýgge» (3:0), Italııanyń «Inter» (3:1) klýbtarynan basym tústi.