Chelıabi ýnıversıtetiniń Qostanaıdaǵy fılıalynyń qyzmeti retteldi — zań

ASTANA. KAZINFORM — Búgin Senattyń jalpy otyrysynda «Qazaqstan Úkimeti men Reseı Úkimeti arasyndaǵy „Chelıabi memlekettik ýnıversıteti“ joǵary bilim berýdiń federaldyq memlekettik bıýdjettik bilim berý mekemesi Qostanaı fılıalynyń jumys isteýi týraly kelisimdi ratıfıkatsııalaý týraly» Zańy maquldandy.

Zańnyń maqsaty — 2024 jyly 27 qarashada Astana qalasynda qol qoıylǵan kelisimdi ratıfıkatsııalaý.

— Kelisim Qazaqstan Respýblıkasynyń aýmaǵynda Chelıabi memlekettik ýnıversıtetiniń Qostanaı fılıalynyń qyzmetin zańnamalyq qamtamasyz etýge jáne jumys isteý sharttaryn bekitýge baǵyttalǵan. Chelıabi memlekettik ýnıversıtetiniń Qostanaı qalasyndaǵy fılıaly 1999 jylǵy «Bilim týraly» QR Zańyna sáıkes 2000 jyly qurylǵan. Kelisimdi ratıfıkatsııalaý fılıal qyzmetin Qazaqstan men Reseı memleketteriniń zańnamasyna sáıkes lıtsenzııalaýǵa jáne akkredıtteýge, sondaı-aq bilim berý baǵdarlamalaryn qaıta qaraýǵa múmkindik beredi. Oqý orny «quqyqtaný», «lıngvıstıka», «fılologııa, „ekonomıka“, „menedjment“ mamandyqtary boıynsha mamandar daıyndaıtyn bolady, — dedi senator Altynbek Nýhuly.

Onyń aıtýynsha, oqytý eki eldiń joǵary nemese joǵary oqý ornynan keıingi bilim berýdiń memlekettik jalpyǵa mindetti standarttaryna sáıkes qazaq, orys jáne basqa da tilderinde júrgizý kózdeledi. Sondaı-aq, Qazaqstan tarıhy men fılosofııa pánderin barlyq mamandyqtar boıynsha oqytý qarastyrylady.

— Fılıal qyzmetine memlekettik baqylaýdy taraptardyń ǵylym jáne joǵary bilim salasyndaǵy ýákiletti organdary júrgizedi. Bilim alýshylardy qabyldaý jáne fılıaldyń qyzmetine memlekettik baqylaý Qazaqstan men Reseıdiń zańnamasyna sáıkes júzege asyrylady. Chelıabi memlekettik ýnıversıtetiniń Qostanaı qalasyndaǵy fılıalyna stýdentterdi oqýǵa qabyldaý Ulttyq biryńǵaı testileýdiń nátıjesi negizinde iske asady. Kelisimdi ratıfıkatsııalaý fılıal qyzmetin quqyqtyq retteýge, stýdentter men oqytýshylardyń quqyqtaryn qamtamasyz etýge, sondaı-aq Qazaqstan men Reseı arasyndaǵy bilim salasyndaǵy yntymaqtastyqty nyǵaıtýǵa múmkindik beredi, — dedi depýtat.

Onyń sózine qaraǵanda, qujatty iske asyrý respýblıkalyq bıýdjetten qosymsha shyǵyndardy talap etpeıdi jáne teris áleýmettik nemese ekonomıkalyq saldarǵa ákelmeıdi.

Buǵan deıin habarlanǵandaı, bıyl Qazaqstanda sheteldik eń myqty 10 ýnıversıtettiń fılıaly ashylady.