Chehııada sýda júretin avtobýs jasaldy

ASTANA. QazAqparat - Chehııada Robert Shýbık esimdi ónertapqyshtyń shaǵyn avtobýsy sýda júzedi, dep jazady 24kz.

Mercedes Sprinter kóliginiń ıesi bul jańalyq týrıstik kompanııalarǵa kóp múmkindik ashady deıdi. Amfıbııa avtobýsqa 12 jolaýshy syıady.

«Mundaı avtobýsty júrgizý motorly qaıyqty basqarýdan qıyn emes. Onyń bir ǵana ereksheligi kóliktegideı jyldamdyqty rettep, qalaqtardyń qozǵalysyn baǵyttaý úshin rýldy aınaldyryp otyrý kerek», - deıdi ónertapqysh Robert Shýbık. 

Saıahatshylarǵa qolaıly bolý úshin tóbesin de ashýǵa bolady. Al bul ispen 2008 jyldan beri aınalysa bastaǵan Shýbık shaǵyn avtobýsqa qaıyqtyń motoryn ornatýdy tek ótken jyly bastaǵanyn aıtady. Ónertapqysh kólikti sýda júrgizýge 8 myń saǵat ýaqytyn arnapty. Endi dóńgelekteri bar úı jasap shyǵarýdy josparlap otyr.