Chehııa aspanynda qazaq ánderi áýeledi
PRAGA. KAZINFORM - Cheh Respýblıkasy Ońtústik Moravııa ólkesiniń ortalyǵy – Brno qalasynda Qazaq mádenıeti kúni aıasynda Oraldyń «Arnaý» etno-folklorlyq ansambli óner kórsetti.
Іs-sharany Brno-Strjed mýnıtsıpalıtetiniń qoldaýymen, «Qazaq Nomad» qazaq dıasporasy uıymyniń kómegimen Qazaqstan Respýblıkasynyń Chehııadaǵy Elshiligi uıymdastyrdy.
Brnonyń tarıhı ortalyǵy – Azattyq alańynda qoıylǵan kontsertti tamashlaýǵa qalalyq ákimshilik ókilderi, qala turǵyndary men qonaqtary, jergilikti qazaq dıasporasy jınaldy.
«Arnaý» ansambliniń ónerpazdary kórermenderdiń nazaryna Qurmanǵazy, Dáýletkereı, Qazanǵap, N.Tilendıev sııaqty uly qazaq kompozıtorlarynyń kúılerin oryndap, jyr-termeden shashý shashyp, qazaq halyq bılerin usyndy.
Kontserttik baǵdarlamanyń sońynda sóz sóılegen Brno-Strjed mýnıtsıpalıtetiniń hatshysy Petr Shtıka ansambl ujymyna tamasha qoıylymdary úshin alǵysyn bildirip, mundaı is-sharalar halyqtar arasyndaǵy ózara túsinistikti tereńdetýge jáne ózara mádenı baıýǵa yqpal etetinin atap ótti.
«Arnaý» ansambliniń Brno qalasynda ótken kóntserti cheh óńiri úshin jarqyn mádenı is-shara boldy. Ártisterdiń ónerleri men olardyń sheberligi cheh jurtshylyǵynyń shynaıy tańdanysyn týdyryp, ystyq yqylaspen jáne úlken qoshemetpen qabyldandy.
