ChatGPT er adamnyń anasyn óltirip, ózine-ózi qol salýǵa ıtermelegen bolýy múmkin – WSJ
ASTANA. KAZINFORM — AQSh-ta ChatGPT jasandy ıntellekti burynǵy Yahoo qyzmetkerin anasyn óltirip, artynsha ózin-ózi óltirýge ıtermelegen bolýy múmkin, dep habarlaıdy Kazinform tilshisi The Wall Street Journal basylymyna silteme jasap.
Basylymnyń málimetinshe, 56 jastaǵy Erık Solberg paranoııadan zardap shekken. Ol ózin únemi tehnologııalar arqyly ańdyp júr dep oılaǵan, tipti ony qart anasy da baqylaıdy dep sengen. Erık bul kúmánderin chat-botpen bólisken, al ChatGPT onyń aqyl-esi durys ekenin aıtyp, onyń oılarymen kelisken.
Polıtsııa Erık pen onyń anasyn 2025 jylǵy tamyz aıynyń basynda óli kúıinde tapty.
ChatGPT-ti jasaǵan OpenAI kompanııasy marqumnyń otbasyna kóńil aıtty. Resmı málimdemede kompanııa psıhologııalyq qıyndyqtarǵa tap bolǵan qoldanýshylarmen chat-bottyń dıalog júrgizý algorıtmderin ózgertýge ýáde berdi.
Buǵan deıin AQSh-ta bir jasóspirim ChatGPT-men óz-ózine qol jumsaý týraly birneshe aı sóıleskennen keıin sýıtsıd jasaǵan. Keıin onyń ata-anasy OpenAI men kompanııanyń bas dırektory Sem Altmanǵa qarsy sotqa aryz bergen.
Iskte jasóspirimniń ólimine ChatGPT-men uzaq ýaqyt júrgizilgen dıalog sebep bolǵany aıtylǵan.
OpenAI jasóspirimniń otbasysyna da kóńil aıtyp, ata-analyq baqylaý jáne jańa qaýipsizdik sharalaryn engizetinin málimdegen.
Buǵan deıin biz ChatGPT-pen júrgizilgen hat almasýlardyń sotta dálel retinde paıdalanylýy múmkin ekenin jazǵan edik.