Tsesnabank sharýalarǵa nesıeni teńgemen beredi

ASTANA. QazAqparat - Tsesnabank aýyl sharýashylyǵy taýarlaryn óndirýshilerge nesıeni tek qana teńgemen beredi. Bul týraly «Tsesnabank» AQ dırektorlar keńesiniń múshesi Nıkolaı Meşerıakov Astanada ótken brıfıngte málimdedi, dep habarlaıdy QazAqparat.

«Aýyl sharýashylyǵy taýarlaryn óndirýshilerge qoldaý kórsetý sharalary ázirlendi. Óz jumysyn tabysty júrgizip otyrǵan kompanııalar úshin nesıelik júktemeni azaıtamyz. Sebebi, ózge valıýtamen berilgen nesıeler aýyl sharýashylyǵyndaǵy kompanııalardyń jumysyna edáýir salmaq túsirdi. Saldarynan olardyń jumysy qıyndaı tústi. Endi barlyq nesıeni tómen mólsherlememen tek teńgemen beremiz. Bul aýyl sharýashylyq kompanııalarynyń tabysty jumys istep, damýyna múmkindik jasaıdy», - dedi Nıkolaı Meşerıakov.

Sonymen birge, N. Meşerıakov aýyl sharýashylyǵy salasynda tabysty eńbek etip júrgen kásiporyndardy atady.

«Mysal retinde «Rodına» (Aqmola oblysy), «Taıynsha astyq» (Soltústik Qazaqstan oblysy) sharýa qojalyqtaryn aıtýǵa bolady. Olar ınnovatsııalyq tehnologııalardy engizip, mol ónim beretin jańa tuqymdardy kóptep ákelýde. Sondyqtan biz aýyl sharýashylyǵy salasyndaǵy kompanııalarmen baılanysty nyǵaıtamyz. Úkimet jáne aýyl sharýashylyǵy mınıstrligimen birigip, osy baǵyttaǵy jumysty jalǵastyramyz», - dedi ol.

Aıta keteıik, «Tsesnabank» AQ óziniń damý strategııasyn qaıta qaraýdy josparlap otyr. Bank otandyq AÓK kásiporyndarynyń senimdi qarjylyq seriktesi bolyp qala bermek. 2018 jyly 19 qyrkúıekte QR Úkimeti men QR Ulttyq Banki «Tsesnabank» AQ-nan 450 mlrd teńgeniń aýyl sharýashylyǵy nesıeleriniń portfelin satyp alý tetigin bekitti.