Tsesnabank salymshylarynyń aqshasyn qutqaryp jatyrmyz - Aqyshev
Onyń aıtýynsha, bankte («Tsesnabank» AQ) jospardan tys jaǵdaı bolǵan. Banktegi jeke jáne zańdy tulǵalardyń salymdarynyń shuǵyl aǵyny baıqaldy.
«Bazel-3 aıasyndaǵy ótimdilik boıynsha jańa koeffıtsıentterdiń engizilýine baılanysty Ulttyq bank Tsesnabankke 150 mlrd teńge kóleminde qaryz berdi. Bul qarjy bankke naryqtyq jaǵdaıda kómek retinde berildi», - dedi Ulttyq bank basshysy.
Aqyshev bankterge kómek kórsetýde nege «ala qoıdy bóle qyrqyp otyrǵanyn» aıtty. Bas bankırdiń aıtýynsha, Ulttyq bank ekinshi deńgeıli bankterge problemalyq jaǵdaı týyndaǵan jaǵdaıda ǵana kómektesedi.
«Biz banktiń qalaı basqarylyp otyrǵanyna, aktsıonerlerdiń problemany sheshýge daıyndyǵyna mán beremiz. Kórip otyrǵanymyzdaı, bank aktsıonerleri qarjylyq ahýaldy turaqtandyrý úshin baryn salyp jatyr. Daǵdarysqa qarsy jańa menedjment taǵaıyndaldy. Onymen qosa, bank aýyl sharýashylyǵy salasyndaǵy 450 mlrd teńgelik nesıe portfelin satý jóninde mámile júrgizip jatyr. Sebebi, kredıtordy aýystyrý óz kezeginde agrosektor kásipkerleriniń jaǵdaıyn jaqsartady», - dedi ol.
Onyń aıtýynsha, Ulttyq bank aktsıonerlerdi emes, salymshylardyń aqshasyn qutqarýǵa baryn salýda.
«Biz aktsıonerlerdi emes, azamattarymyz ben kásiporyndarymyzdyń aqshasyn saqtap qalýymyz kerek. Eshkim aqshany qaltasyna basyp almaıdy. Aqsha klıentterge qyzmet kórsetýge jumsalady. Eger naryqtaǵy úlesi joǵary banktiń basyna osyndaı kún týsa, ol túgel ekonomıka jáne qarjy sektoryna áser etýi múmkin. Bul qaryz Ulttyq bankke qaıtady»,- dedi Aqyshev.
Ulttyq bank 2019 jyldyń basynan bank salasyn baqylaýdyń táýekelge baǵyttalǵan túrin engizbek.
