BJZQ zeınetaqy aktıvteriniń tabysy ınflıatsııa deńgeıinen joǵary
Biryńǵaı jınaqtaýshy zeınataqy qory taratqan málimetterge súıensek, 2017 jylǵy 1 qyrkúıektegi jaǵdaı boıynsha zeınetaqy jınaqtarynyń jalpy somasy 7,43 trln teńge bolǵan. Jyl basynan bergi ósim 741 mlrd teńgeni (11%) qurady. Al, salymshylardyń jeke zeınetaqy shottaryna eseptelgen taza ınvestıtsııalyq tabys somasy 398,57 mlrd teńgege jetti.
«Aǵymdaǵy jyldyń 1 qyrkúıegindegi jaǵdaı boıynsha BJZQ zeınetaqy aktıvteriniń tabystylyǵy jyl basynan beri 5,78 paıyzdy qurady. Bul ınflıatsııa deńgeıinen 1,9 paıyzǵa joǵary (ınflıatsııa 3,9% boldy). 2017 jylǵy 1 qyrkúıektegi jaǵdaıda sharttardyń barlyq túrleri boıynsha salymshylardyń (alýshylardyń) jeke zeınetaqy shottarynyń (JZSh) sany 10,1 mln birlik, onyń ishinde mindetti zeınetaqy jarnalary (MZJ) esebinen 9,63 mln birlik boldy. Mindetti kásiptik zeınetaqy jarnalary (MKZJ) boıynsha salymshylardyń JZSh sany 432 myń birlikti, al erikti zeınetaqy jarnalary (EZJ) shamamen 40 myń birlikti qurady»,- dedi BJZQ-nyń basqarýshy dırektory Janar Tólegenova. 
2017 jyldyń basynan beri, ıaǵnı 1 qańtar men 31 tamyz aralyǵynda BJZQ-dan tólengen zeınetaqy tólemderiniń somasy 148,57 mlrd teńge, onyń ishinde saqtandyrý uıymdaryna jasalǵan aýdarymdar - 17,58 mlrd teńge boldy. Salystyryp qaraıtyn bolsaq, ótken jyldyń sáıkes kezeńinde BJZQ-dan 118,54 mlrd teńge tólengen, onyń ishinde saqtandyrý uıymdaryna jasalǵan aýdarymdar - 12,51 mlrd teńgeni quraǵan.