BJZQ zeınetaqy aktıvi 2017 jyly 16,4 paıyzǵa - 7,77 trln teńgege artty

ASTANA. QazAqparat - 2018 jyldyń 1 qańtaryndaǵy jaǵdaı boıynsha QR Ulttyq bankiniń basqarmasyndaǵy «Biryńǵaı jınaqtaýshy zeınetaqy qory» AQ-daǵy (BJZQ) zeınetaqy aktıvi 7774,82 mlrd teńgege jetken. Bul 2017 jyldyń basyndaǵy jaǵdaımen salystyrǵanda 1094,68 mlrd teńgege, ıaǵnı 16,4 paıyzǵa artyq, dep habarlaıdy «QazAqpart» HAA tilshisi BJZQ-qa silteme jasap.

Taza ınvestıtsııalyq kiris 2017 jyly 550,6 mlrd teńgege jetken. BJZQ-nyń salymshylar (alýshy) esebine bólingen zeınetaqy qorynyń túsimi ótken jyly 7,92 paıyz (7,1 paıyzdyq ınflıatsııa deńgeıinde) kórsetkishti kórsetip otyr.

Búgingi kúni portfeldegi negizgi úlesti, ıaǵnı 46,14 paıyzdy - «Qazaqstan Respýblıkasynyń qundy qaǵazdary» quraıdy. 2017 jyldyń jeltoqsanyndaǵy olardyń aǵymdaǵy baǵasy 167,14 mlrd teńgege qymbattap, 3587,63 mlrd teńgeni quraǵan.

Investıtsııalanǵan zeınetaqy aktıvteriniń úlesi boıynsha ekinshi orynda - «Qazaqstan Respýblıkasynyń ekinshi deńgeıdegi bank oblıgatsııalary» tur. Onyń úlesi - 16,03%. Bul oblıgatsııalardyń aǵymdaǵy quny 1246,49 mlrd teńgeni kórsetken.

Al úshinshi orynǵa «Shetel memleketteriniń memlekettik qundy qaǵazdary» qarjylyq quraldary jaıǵasqan. Onyń quny 948,84 mlrd teńgeni qurap, portfeldegi úlesi 12,2 paıyzdyq kórsetkishti kórsetip tur.

Zeınetaqy aktıvi boıynsha ınvestıtsııalyq kiristiń mólsheri qarjy naryǵyndaǵy jáne zeınetaqy aktıvteri ınvestıtsııalanǵan qarjy quraldarynyń qunyna baılanysty bolady deptúsindirdi mamandar.