BJZQ WhatsApp-ta taralǵan aqparatty joqqa shyǵardy
«Zeınetaqy qory ınflıatsııaǵa baılanysty 150 000 teńgeni óteıtini týraly WhatsApp arqyly salymshylarǵa (alýshylarǵa) taralǵan aqparat shyndyqqa janaspaıdy», - dedi qordyń baspasóz qyzmetinde.
«Qarjy aıyrmasyn tóleý degenimiz - memlekettik bıýdjettiń qarajatynan bir jolǵy tólem júrgizý. Salymshylar memleket kepili arqyly qarajat alý quqyǵyna zeınetkerlik jasqa jetkende ıe bolady. Budan bólek, atalǵan quqyqqa merzimsiz múgedektik qoıylǵan jaǵdaıda I jáne II top múgedekteri, Qazaqstannan shet elderge turǵylyqty meken-jaıyn aýystyrǵan azamattar, MZJ jáne MKZJ aýdarǵan sheteldikter men azamattyǵy joq tulǵalar, memleket kepilimen tólem alýǵa quqyly azamat qaza tapqan jaǵdaıda onyń muragerleri ıe», - delingen qordyń habarlamasynda.
Qorda málim etkendeı, memleket kepiline úmitker bolý úshin mekenjaı boıynsha «Azamattarǵa arnalǵan úkimet» memlekettik korporatsııasynyń áleýmettik tólemderdiń vedomstvoaralyq eseptik ortalyǵyna ótinish jazý kerek. Ár adammen arnaıy óńdelgen ádisteme arqyly esep jasalyp, azamattyń bank shotyna tólem júrgiziledi.
Qor barlyq salymshylar men alýshylarǵa áleýmettik jelilerde taralatyn ártúrli habarlamalarǵa saqtyqpen qarap, tek resmı aqparat kózderindegi maǵlumattarǵa senýge keńes beredi.
