BJZQ ýákiletti operatorlarmen ózara is-qımyl týraly kelisim jasady

NUR-SULTAN. QazAqparat - BJZQ «Otbasy banki» turǵyn úı qurylys jınaq banki» AQ, «Qazaqstan Halyq banki» AQ, «Altyn Bank» AQ jáne «Bank TsentrKredıt» AQ-men ózara is-qımyl týraly kelisim jasady, dep habarlaıdy QazAqparat.

Zańnamada turǵyn úı jaǵdaılaryn jaqsartý jáne emdelýge aqy tóleý maqsatynda BJZQ-dan birjolǵy zeınetaqy tólemderin alý úshin salymshylardyń ýákiletti operatordyń ınternet-resýrsynda elektrondyq ótinishterdi toltyra otyryp, Qazaqstan Respýblıkasynyń Úkimeti aıqyndaǵan ýákiletti operatorlarǵa júginetini kózdelgen.

Óz ótinishinde salymshy birjolǵy zeınetaqy tólemderin paıdalaný maqsatyn jáne maqsatty paıdalanýǵa jiberiletin qoljetimdi somany kórsetedi. Ýákiletti operator salymshylardyń ótinishterin qarap, olardy maquldaý týraly sheshim qabyldaıdy. Sondaı-aq, birjolǵy zeınetaqy tólemderin Qordan ýákiletti operatorda ashylǵan salymshylardyń arnaıy shottaryna aýdarý boıynsha BJZQ-men ózara is-qımyldar júrgizip, birjolǵy zeınetaqy tólemderiniń nysanaly paıdalanylýyna monıtorıng jasaıdy.

BJZQ men ýákiletti operatorlar arasyndaǵy ózara is-qımyl elektrondyq aqparat almasý arqyly jáne ózara is-qımyl týraly tıisti kelisimder negizinde júzege asyrylady.

Qazirgi ýaqytta BJZQ «Otbasy banki» turǵyn úı qurylys jınaq banki» AQ, «Qazaqstan Halyq banki» AQ, «Altyn Bank» AQ jáne «Bank TsentrKredıt» AQ-men ózara is-qımyl týraly kelisimder jasady.

Kelisim ýákiletti operator men BJZQ arasynda birjolǵy zeınetaqy tólemderin esepke alý, aýdarý jáne qaıtarý máseleleri boıynsha aqparattyq ózara is-qımyl jasaý jáne aqparat almasý tártibin, sondaı-aq, aqparattyń qupııalylyǵyn saqtaý jónindegi sharttar men mindettemelerdi qosa alǵanda, Kelisim taraptarynyń árqaısysynyń mindetteri men jaýapkershiligin aıqyndaıdy.

BJZQ men ýákiletti operatorlardyń aqparattyq júıeleriniń biriktirilýi «elektrondyq úkimet» veb-portalyndaǵy ıntegratsııalyq servıs arqyly júzege asyrylady.