BJZQ salymshylarynyń zeınetaqy jınaǵy 12,9 trıllıon teńgeden asty

NUR-SULTAN. QazAqparat – Biryńǵaı jınaqtaýshy zeınetaqy qory salymshylarynyń zeınetaqy jınaqtarynyń somasy 2021 jylǵy 1 qańtarda 12,9 trıllıon teńgeden asty. Oǵan zeınetaqy jarnalary men ınvestıtsııalyq tabys ta kiredi, dep habarlaıdy QazAqparat qordyń baspasóz qyzmetine silteme jasap.

Qordyń aqparaty boıynsha 2020 jyldyń 12 aıynda salymshylardyń shottaryna 1,2 trln teńge mólsherinde taza ınvestıtsııalyq kiris eseptelgen. Bul 2019 jyldyń sáıkes kezeńindegi kórsetkishten eki esege jýyq mólsherge artyq.

«Jalpy barlyq zeınetaqy aktıvi BJZQ-ǵa biriktirilgen sátten bastap Ulttyq bank qamtamasyz etken ınvestıtsııalyq tabys 4,7 trln teńgege jetti. 2021 jyldyń 1 qańtaryna zeınetaqy jınaqtarynyń jalpy kólemindegi taza ınvestıtsııalyq tabystyń úlesi 34,5%-dy qurady. Eger Qazaqstannyń jınaqtaýshy zeınetaqy júıesi qurylǵan 1998 jyldan bergi kezeńdi alatyn bolsaq, taza ınvestıtsııalyq tabys 5,5 trıllıon teńgeden asty. Osy ýaqyt ishinde ınvestıtsııalyq kiristilik ósý qorytyndysymen 602,90%-dy qurady. Al ınflıatsııa 496,65% boldy. Osylaısha 2021 jylǵy 1 qańtardaǵy jaǵdaı boıynsha zeınetaqy aktıvteriniń naqty tabystylyǵy 106,25%-dy qurap otyr», - delingen habarlamada.