BJZQ salymshylarynyń 2020 jylǵy taza ınvestıtsııalyq tabysy 1,2 trln teńgeden asty
Qordyń málimdeýinshe, 2020 jyldyń 12 aıynda salymshylardyń shottaryna 1,2 trln teńge mólsherinde taza ınvestıtsııalyq kiris esepteldi. Bul 2019 jyldyń sáıkes kezeńindegi kórsetkishten eki esege jýyq mólsherge artyq (2019 jylǵy taza ınvestıtsııalyq kiris 641,8 mlrd teńge).
Aıta keteıik, 2020 jyly 1 óańtardan bastap 31 jeltoqsanǵa deıin ınflıatsııa 7,5% bolǵan kezde kiristilik 10,92% qurady.
«Jeke zeınetaqy shotyna túsetin, esebin BJZQ júrgizetin zeınetaqy jarnalaryn zeınetaqy aktıvterin senimgerlikpen basqarýshy Ulttyq banki túrli qarjy quraldaryna ınvestıtsııalaıdy.
Salymshylardyń (alýshylardyń) zeınetaqy jınaǵynyń somasy zeınetaqy aktıvterin ınvestıtsııalaý nátıjesine sáıkes kún saıyn qaıta esepteledi jáne qaıta baǵalanady. Investıtsııalyq tabystyń quramyna baǵaly qaǵazdar (salymdar jáne basqa da operatsııalar) boıynsha syıaqy, qarjy quraldaryn naryqtyq qaıta baǵalaý, valıýtalyq qaıta baǵalaý, syrtqy basqarýdaǵy aktıvter boıynsha kirister jáne t. b. kiredi», delingen habarlamada.
Jalpy alǵanda, barlyq zeınetaqy aktıvteri qorǵa biriktirilgen sátten bastap Ulttyq bank qamtamasyz etken ınvestıtsııalyq tabys 4,7 trln teńgege jetti. 2021 jyldyń 1 qańtaryna zeınetaqy jınaqtarynyń jalpy kólemindegi taza ınvestıtsııalyq tabystyń úlesi 34,5% qurady.
«Eger Qazaqstannyń jınaqtaýshy zeınetaqy júıesi qurylǵan 1998 jyldan bergi kezeńdi alatyn bolsaq, taza ınvestıtsııalyq tabys 5,5 trıllıon teńgeden asty. Osy ýaqyt ishinde ınvestıtsııalyq kiristilik ósý qorytyndysymen 602,90% qurady. Al ınflıatsııa 496,65% boldy. Osylaısha 2021 jylǵy 1 qańtardaǵy jaǵdaı boıynsha zeınetaqy aktıvteriniń naqty tabystylyǵy 106,25%», delingen habarlamada.
Aıta ketý kerek, zeınetaqy jınaqtary – bul uzaq merzimdi ınvestıtsııalar jáne ınvestıtsııalyq tabystyń mólsherin keminde 1 (bir) jyl kezeńinde taldaǵan oryndy.