BJZQ qoryn basqarýdy sheteldikterge berý qarastyrylýda

Almaty. QazAqparat - BJZQ aktıvteriniń bir bóligin basqarýdy sheteldik kompanııalarǵa berý mehanızmin júzege asyrý bastaldy. Bul týraly BJZQ tóraǵasynyń qatysýymen ótken baspasóz máslıhatynda belgili boldy, dep habarlaıdy QazAqparat tilshisi.

«BJZQ» basqarma tóraǵasynyń orynbasary Saýle Egeýbaevanyń aıtýynsha, damýshy naryqtardyń jahandyq oblıgatsııalarynyń mandaty boıynsha Aviva kompanııasynyń basqarýyna 220 mln. AQSh dollary berildi.

 «Bul aqsha esebindegi zeınetaqy qorynyń aktıvteri. Aǵymdaǵy jyldyń 1 sáýirine qaraı 29 damýshy eldiń BB- reıtınginen tómen emes 250 qundy qaǵaz emıtentteri belgilengen mandat boıynsha anyqtalǵan. Joǵaryda atalǵan kompanııa búginde baqylaýynda 450 mlrd AQSh dollary bar halyqaralyq deńgeıdegi alyp uıymdardyń qataryna kiredi», - deıdi Saýle Egeýbaeva.

BJZQ basshylyǵynyń aıtýynsha, qor aktıvteri qarjyny basqarýdyń naqty baǵyttary men barlyq ortaq sharttardyń oryndalý negizinde basqarýǵa beriledi. Ótken jyly, dál osy basqarý mehanızmi aıasynda aktıvterdiń bir bóligin qazaqstandyq kompanııalarǵa berý máselesi qaralǵan bolatyn.

 «Bul másele jyl boıy talqylanyp, búginge deıin naqty sheshimin tapqan joq. Premer-Mınıstr tapsyrmasyna oraı, bul másele jyl sońyna deıin sheshilýi tıis. Basqarýǵa tek aqsha emes, qundy qaǵazdar da beriletini naqtylanǵannan keıin biz de daıyn bolýymyz kerek. Dese de, sheteldik kompanııalar qazaqstandyq emıtentteri bar qundy qaǵazdar portfeline qyzyǵýshylyǵy tómen bolǵandyqtan, olarǵa aqsha esebinde beriledi», - dedi «BJZQ» AQ basqarma tóraǵasy Nurbúbi Naýryzbaeva.

Avtor: Albert Ahmetov

Aýdarma: Joldas Órisbaev