BJZQ keńse jaldaýǵa jarty mıllıardtan astam teńge jumsaǵan

  ASTANA. QazAqparat - «Biryńǵaı jınaqtaýshy zeınetaqy qory» AQ Basqarma tóraıymy Nurbúbi Naýryzbaeva Qordyń óńirlerdegi keńselerin jalǵa alý quny jarty jylda 588 mln teńgeni quraǵanyn málim etti, dep habarlaıdy QazAqparat tilshisi.

Atap aıtqanda, búgin Parlament Senatynda bolǵan kezdesýde depýtattar BJZQ óńirlerde keńse ǵımarattaryn jaldaýǵa qomaqty qarjy jumsap jatqanyn aıtty.

«Barlyq oblys jáne aýdan ortalyqtarynda bizdiń keńseler bar. Qazirgi kezde Qorda 1 987 adam jumys isteıdi. Onyń 417-si ortalyq keńsede, al qalǵan 1,5 myńnan astamy óńirlerdi qyzmet etýde», - dep toqtaldy Naýryzbaeva.

Onyń sózine qaraǵanda, Qordyń bas keńsesi de jalǵa alynyp otyr. Qazirgi kezde BJZQ-nyń 200- den astam bólimshesi bar. Onyń kóbisi aýdan ortalyqtarynda, eldi mekenderde ornalasqan.

«Meniń oıymsha, bul jerlerde bizge keńse satyp alý ekonomıkalyq turǵyda tıimdi emes. Óıtkeni atalǵan ortalyqtarda (aýdandar men eldi mekenderde) keńse jabylsa, ony satý máselesi keıbir qıyndyqtardy týdyrady. Sonymen qatar, byltyr oblys ortalyqtarynda birneshe ǵımarattardy satyp alý boıynsha tıisti jumystardy pysyqtadyq. Alaıda satylymǵa shyǵarylǵan ǵımarattardyń baǵasy joǵarylaý boldy. Degenmen de osy baǵytta tıisti sharalardy atqaryp jatyrmyz. Qazirgi ýaqytta Qordyń ortalyq keńsesine  ǵımaratty Almatydan satyp alamyz degen josparymyz bar. Munymen qosa, birneshe úlken oblys ortalyqtarynda ózimizdiń fılıaldarymyzǵa keńse almaqpyz», - dedi ol. 

N. Naýryzbaeva keńselerdi jalǵa alýǵa qansha qarjy jumsalatynyn jarııa etti.

«Shynymen de, jalǵa alýǵa biraz qarjy jumsaımyz. Mysaly, jartyjyldyqta 588 mln teńge tóledik. Atap aıtqanda, qazirgi kezde 218 bólimshege keńse satyp alý qarjylyq turǵydan tıimdi bolmaı tur», - dep túıdi BJZQ basshysy.