BJZQ «Qazaqstan qaǵazy» kompanııasyndaǵy boryshyn qaıtaryp almaq

ALMATY. QazAqparat - «BJZQ» AQ basqarýshy dırektory Máýlen Óteǵulov baspasóz máslıhaty barysynda boryshker emıtentterdiń biri «Qazaqstan qaǵazy» kompanııasynan aqshany qalaı qaıtarylatyny jaıly aıtty, dep habarlaıdy QazAqparat tilshisi.

Máýlen Óteǵulovtyń aıtýynsha, «Qazaqstan Qaǵazy» AQ burynǵy aktsıonerlerine qatysty London sotyna bergen aryzy qanaǵattandyrylsa, qaryz tez arada qaıtarylmaq.

Kompanııa burynǵy aktsıonerlerinen 260 mln AQSh dollaryna talap etip otyr.

Sot Maqsat Áriptiń 95 mln dollar turatyn halyqaralyq aktıvterine, onyń ishinde 17 mln dollarlyq záýlim úıine tyıym saldy. Ekinshi aktsıoner Baǵlan Júnispen 3 mln dollardy qaıtarý jóninde beıbit kelisimge qol qoıyldy.

«4 jylǵa sozylǵan sot protsesiniń nátıjesinde «Qazaqstan Qaǵazy» AQ pen kredıtorlar toby Londondaǵy Joǵarǵy sotta oń sheshimge qol jetkizdi. Sot úkiminiń arqasynda kompanııa BJZQ aldyndaǵy 12,5 mlrd teńge kólemindegi qaryzdy qaıtaryp alý múmkindigi týyp otyr», - dedi Máýlen Óteǵulov.

Aıta ketý kerek, «Qazaqstan Qaǵazy» AQ 2001 jyly qurylǵan. 2009 jyly emıtent defoltqa ushyrady. Sol jyly aktsınerler quramy ózgerdi.

2015 jyldyń 2 qazanynda «Qazaqstan Qaǵazy» AQ taǵy dadefoltqa ushyrady. 2016 jyldyń 8 maýsymynda aktsıonerlik qoǵam sot arqyly ońaltý sharalarynan ótti. 

2016 jyldyń maýsymy men tamyzy aralyǵynda kredıtorlar men qor ókilderi  Emıtenttiń ońaltý josparyn qurdy.

Nátıjesinde «Qazaqstan Qaǵazy» AQ burynǵy aktsıonerlerinen 15 mlrd teńge óndirý týraly is sotqa berildi.

2016 jyldyń qyrkúıeginen 2017 qarashasyna deıin emıtent BJZQ aldyndaǵy 358 mln teńge kólemindegi qaryzyn ótedi.

2013 jyldyń tamyzynda «Qazaqstan Qaǵazy» AQ qazirgi basshylyǵy burynǵy aktsıonerler Maqsat Árip, Baǵlan Júnis, Shynar Dıhanbaevany aqsha jymqyrdy degen aıyppen sotqa berdi.