BJZQ qarjysy qaıda ınvestıtsııalanyp jatyr
Statıstıkaǵa sáıkes, zeınetaqy qorynan 9,4 mln shot ashylǵan, onda salymshylardyń 7 273,3 mlrd teńge jınaǵy bar. Zeınetaqy tólem somasy 134,3 mlrd teńgeni quraıdy.
«Jalpy ınvestıtsııalyq qorjynnyń negizgi úlesi QR memlekettik qundy qaǵazdary men QR emıtentteriniń korporatıvti qundy qaǵazdary bolyp tabylady (zeınetaqy aktıvteriniń 42,8% jáne 32,9%). 10 %-y ekinshi deńgeıli bankterdiń úlesinde. Bıyl BZJQ qarjysyn ınvestıtsııalaý úderisi baıaý júrip keledi. Sebebi QR Úkimeti atalǵan salada birneshe joba júzege asyrýda. Sondyqtan bos turǵan qarjyny bizdiń notalarǵa ınvestıtsııalaýǵa májbúr. Bul Ulttyq banktiń shyǵyndarynyń artýyna ákelip jatyr. Memlekettik baǵdarlamany jedeldetý jaıly tapsyrma berilgen soń qarjyny ıgerý jalǵasady», - dedi D.Aqyshev.
Qazirgi tańda aınalymdaǵy notalardyń kólemi 3 090, 6 mlrd teńge.
Sonymen qatar, bas bankır BJZQ aktıvteriniń sheteldik valıýtaǵa kóbirek aýdarylyp jatqanyn aıtty.
«BZJQ qarjysyn belgili bir kompanııalarǵa senimdi basqarýǵa berý týraly zańǵa engiziletin ózgerister áli talqylanyp jatyr. Alaıda qazir BJZQ valıýtalyq aktıvteriniń úlesin arttyryp jatyrmyz. Bul jıylǵan qarjyny ár taraptandyryp, syrtqy basqarýshy kompanııalarǵa Ulttyq qor men altyn valıýtalyq rezervin utymdy paıdalanýdyń úzdik tájirıbesin eskere otyryp berýge múmkindik beredi. Bul óz kezeginde álemdik naryqtaǵy eń sapaly sheteldik kompanııalardy tartýǵa yqpal etedi. Komıssııalardy azaıtady», - dedi bank basshysy.