BJZQ qarjylary qaıda quıylyp jatyr

ALMATY. QazAqparat - «Biryńǵaı jınaqtaýshy zeınetaqy qory» AQ ókilderi zeınetaqy aktıvteriniń qazirgi kezdegi ınvestıtsııalyq qorjynynyń qurylymy týraly aıtty, dep habarlaıdy «QazAqparat» HAA tilshisi.

2018 jylǵy 1 aqpanda Zeınetaqy qorynyń QR Ulttyq bankiniń senimdi basqarýyndaǵy zeınetaqy aktıvteri 7,8 trln teńgeni qurady.

«Qorjyndaǵy úlestiń negizgi bóligi 44,47%-ti Qazaqstan Respýblıkasynyń memlekettik baǵaly qaǵazdary quraıdy, olardyń úlesi jyl basynan beri 3,18%-ke azaıdy. Memlekettik baǵaly qaǵazdardyń aǵymdaǵy quny 3 473,64 mlrd teńge bolyp otyr. Investıtsııalanǵan zeınetaqy kólemi boıynsha ekinshi orynda Qazaqstan Respýblıkasynyń ekinshi deńgeıli bankteriniń oblıgatsııalary tur, olardyń qorjyndaǵy úlesi 15,82%-ke teń. Aǵymdaǵy quny 1 235,92 mlrd teńgeni qurady», - deıdi «BJZQ» AQ basqarma tóraǵasynyń orynbasary Sáýle Egeýbaeva.

Budan tys, ınvestıtsııa qorjynynda 2018 jylǵy 1 aqpandaǵy jaǵdaı boıynsha shet memleketterdiń baǵaly qaǵazdary (12,61%), Qazaqstannyń kvazımemlekettik uıymdarynyń oblıgatsııalary (10,11%), Qazaqstan bankterindegi depozıtter (4,20%), sheteldik bankterdegi depozıtter (5,25%) jáne qorjyn táýekeli men tabystylyǵynyń ratsıonaldy qatynasyn qamtamasyz etetin basqa da quraldar bar.

«Qorjynnyń valıýtalyq qurylymy jaıynda aıtar bolsaq, ulttyq valıýtamen esepteletin quraldar 70,81%-ti quraıdy, qalǵan 29,19% sheteldik valıýtadaǵy quraldardyń úlesine tıesili, sonyń 28,61%-in AQSh dollary quraıdy. Investıtsııalyq qyzmet júrgizýdiń, sondaı-aq sheteldik valıýtalar baǵamynyń qubylmalylyǵy jáne qarjy quraldarynyń naryqtyq qunynyń ózgerýiniń nátıjesinde, 2018 jyldyń qańtaryndaǵy taza ınvestıtsııalyq tabys 9,8 mlrd teńgeni qurady», - deıdi ol.