BJZQ isine qatysty sot protsesi: Taraptardyń jaryssózi bastaldy
Osyǵan deıin advokattar sotqa aýdıtorlar men «BýzgýlAýrým» JShS klıenti bolǵan lıstıng jáne ınvestıtsııalyq kompanııa jetekshilerin káýeger retinde shaqyrtý týraly ótinimhat bergen bolatyn. Sonyń negizinde búgingi jaryssózde kýágerlerge suraqtar qoıyldy. Qorǵaýshy tarap sot-ekonomıkalyq sarapatama qorytyndysy boıynsha birqatar saýal qoıdy.
Sot otyrysynda kýágerler advokattar, memlekettik aıyptaýshy men sottalýshylardyń suraqtaryna jaýap berip, «Býzgýl Aýrým» JShS-niń qundy qaǵazdardy shyǵarý, olardy bırjaǵa ornalastyryp, BJZQ-ǵa satý máselesine qatysty ózderine belgili operatsııalar týraly baıandap berdi.
Sonymen qatar, sottalýshylardyń qorǵaýshylary «BýzgýlAýrým» qundy qaǵazdarynyń baǵasyna jáne ken óndirýshiniń qordaǵy jarǵylyq kapıtaldy arttyrýyna qatysty «Scot Holland» baǵalaýshylarynyń eki esebin sotqa usyndy.
Eske sala keteıik, 2017 jyldyń 9 qańtarynda BJZQ-nyń burynǵy basqarma tóraǵasy Rýlsan Erdenaev, BJZQ-nyń Táýekelderdi basqarý departamenti qarjylyq táýekelder basqarmasynyń burynǵy basshysy Musa Bahtov, «Alataý Munaı Altyn» kompanııasynyń basshysy B.Kenjebaev, «Býzgýl Aýrým» JShS basshysy A.Naızaǵarın quny 5 mlrd teńge bolatyn kúdikti kelisimshart boıynsha ustalǵan bolatyn.
Atalǵan adamdar QRQK 189-babynyń 4-bólimi boıynsha aıyptalyp otyr.