BJZQ ınvestıtsııalyq tabysy 7 aıda 450 mlrd teńge boldy
Ústimizdegi jyldyń shilde aıynyń aıaǵynda BJZQ ınvestıtsııalyq qorjynynyń jıyntyq quny 8,6 trln teńgeni qurady. Bul byltyrǵy 7,3 trln teńgeden 17,9% artyq.
Investıtsııalar qunynyń eń joǵary paıyzdyq ósimi aqsha jáne basqa aktıvterde - 168,1%, shaǵyn nesıe uıymdarynyń qundy qaǵazdarynda 98,4% jáne memlekettik qundy qaǵazdarda - 30,8% baıqaldy.
Úleskerlik qatynasynda qorjyn qurylymy ózgere qoıǵan joq, negizgi ınvestıtsııalar QR memlekettik qundy qaǵazdarynda (47,5% nemese 4,1 trln teńge) bolyp otyr. Odan keıingi oryndarda QR uıymdarynyń qundy qaǵazdary - 24,5% nemese 2,1 trln tenge jáne shet memleketterdiń qundy qaǵazdary - 11,2% nemese 964,9 mlrd teńge tur.
BJZQ portfeliniń naryqtaǵy qunynyń ortasha ósimi jyl basynan beri - 10,3% qurady.
2018 jyldyń basynan beri eseptelgen ınvestıtsııalyq tabys 449,7 mlrd teńgeni qurady. Bul - 2017 jyldyń osy kezeńimen (316,3 mlrd) salystyrǵanda 42,2% artyq.
Negizgi tabys qundy qaǵazdar, salymdar jáne «keri REPO» operatsııalary boıynsha syıaqylardyń esebinen alynyp otyr. Byltyr 300,1 mlrd teńge bolsa, bıyl bul kórsetkish 312,9 mlrd teńgeni qurap otyr. Sheteldik valıýtany qaıta esepteý esebinen tabys 119,3 mlrd teńge boldy.
BJZQ ınvestıtsııalyq qorjynynyń basty valıýtasy - teńge, ulttyq valıýtadaǵy ınvestıtsııalardyń úles salmaǵy 67,7% nemese 5,8 trln teńgege jetti.
Qorjyn qurylymyndaǵy mańyzy jaǵynan ekinshi valıýta - AQSh dollary bolyp otyr. Onyń úles salmaǵy - 31,9% (2,7 trln teńge). Reseı rýbliniń úlesi 11,4% qysqaryp, jalpy qorjynnyń nebári 0,4%-yn nemese 30,4 mlrd teńgeni qurady. Basqa valıýtalardaǵy ınvestıtsııalardyń úlesi 0,1%-dan, ıaǵnı 8,2 mlrd teńgeden aspaıdy.