BJZQ burynǵy basshysyn qamaýǵa alý merzimi 9 aıǵa uzartyldy

ALMATY. QazAqparat -  Biryńǵaı jınaqtaýshy zeınetaqy qory basqarmasynyń eks-tóraǵasy Rýslan Erdenaevty qamaýǵa alý 9 aıǵa uzartyldy, dep habarlaıdy QazAqparat tilshisi Almaty qalalyq sotynyń baspasóz qyzmetine silteme jasap.

«Almaty qalasy Almaly aýdandyq sotynyń qaýlysymen kúdikti tulǵalar - «BJZQ» AQ basqarmasynyń burynǵy tóraǵasy R. Erdenaev, «BJZQ» AQ táýekelderdi basqarý departamenti qarjy táýekelderi basqarmasynyń burynǵy basshysy M. Baqytov, «Alataý Munaı Altyn» AQ qadaǵalaý keńesiniń tóraǵasy B. Kenjebaev, «Býzgýl Aýrým» JShS dırektory A. Naızaǵarınge qatysty qamaýǵa alý túrindegi bultartpaý sharasy toǵyz aıǵa, ıaǵnı 2017 jylǵy 28 qyrkúıekke deıin uzartyldy», - dep habarlady sot.

Sonymen qatar, sot «Megatransazııa» JShS dırektorynyń orynbasary Talǵas Turtaevqa qatysty bultartpaý sharasyn - 7 aıǵa, ıaǵnı 23 qyrkúıekke deıin, BJZQ basqarma tóraǵasynyń burynǵy orynbasary Dabyr Medetbekovke qatysty bultarpaý sharasy 8-qyrkúıekke deıin sozý týraly ótinishti qabyldady.

Sotqa deıingi tergeý organdary tarapynan atalǵan tulǵalar jeke menshikke qarsy qasaqana aýyr qylmystyq quqyqbuzýshylyq jasady degen kúdikke ilingen. Olar Qazaqstan Respýblıkasy Qylmystyq kodeksiniń 189-baby 4-bóligi 2-tarmaǵy (senip tapsyrylǵan bireýdiń menshigin ıemdený jáne ysyrap etý) boıynsha aıyptalǵan.