BJZQ bir ǵana monopolııa aıasynda qalmaýy kerek - Azat Perýashev
Aıta keteıik, jalpy otyrysta depýtattar bazalyq zeınetaqy taǵaıyndaý tártibine arnalǵan qujatty maquldaǵan bolatyn.
Depýtattyń pikirinshe, búgingi kúni Biryńǵaı jınaqtaýshy zeınetaqy qoryndaǵy qarajattardyń tıimdi jumsalýy basy ashyq másele kúıinde qalyp otyr. «Bul rette BJZQ qarajatyn paıdalaný tártibin talqylaýǵa qaıta oralý qajet dep sanaımyn, bizde bir ǵana memlekettik qordyń monopolııalyq jaǵdaıy tıimsizdikke úlken táýekel týdyratyndyqtan, oǵan úsh-tórt kúshti qorlardy qosý arqyly básekelestik qaǵıdatyn qalyptastyrý kerek», dep sanaıdy A. Perýashev.
Onyń aıtýynsha, aldaǵy ýaqytta túrli áleýmettik tólemderdiń bolýy bızneske qosymsha júkteme salady. Bul rette depýtat qosymsha zeınetaqy aýdarymdaryna qatysty másele túsinikti ekenin aıta kele, bıznes qaýymdastyq tarapynan medıtsınalyq saqtandyrý qorlaryna jasalýy múmkin tólemderge alańdaýshylyq bar ekenin jetkizdi.
«Erte bastan aıtaıyn, bundaı birin biri qaıtalaı beretin syzbanyń qajettiligi shamaly. Biz bıznesti damytýdy yntalandyratyn, salyq salý bazasyn arttyratyn saýatty ekonomıkalyq tetik kerek dep esepteımiz. DSU men EAEO aıasyndaǵy básekelestik jaǵdaıynda bizdiń bıznes qosymsha júktemelerge emes, kerisinshe qoldaý sharalary men saýatty ekonomıkalyq basqarýǵa muqtaj», -dedi Azat Perýashev.
Osyǵan baılanysty, depýtat Qazaqstannyń zeınetaqy júıesi el ekonomıkasynyń «túpsiz kúbisine» aınalyp ketpesin degen qaýpin jetkizdi. «Búgin májbúrli shara desek, onda túsinýge bolady. Degenmen, biz qarajattyń qaı baǵytqa ketetinin bilýge tıispiz. Sondyqtan da, zeınetaqy qorynyń shyǵys bóligine qatań baqylaý kerek», dedi ol.
Eske salaıyq, Májilis «Qazaqstan Respýblıkasynyń keıbir zańnamalyq aktilerine zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady. Zań jobasynda zeınetaqy júıesine qatysý ótiline baılanysty bazalyq zeınetaqy taǵaıyndaý tártibi ózgertiledi, atap aıtqanda, bul ózgeris 2017 jyldyń 1 shildesinen bastap júzege asady.