BJZQ aktıvteri qaıda ınvestıtsııalanyp jatyr

ASTANA. QazAqparat - «Biryńǵaı jınaqtaýshy zeınetaqy qory» AQ-nyń zeınetaqy aktıvteri portfeliniń quny 2018 jyldyń 1 qańtarynda 7811,89 mıllıard teńgeni qurap otyr. Soma bir aıdyń ishinde 37,7 mıllıard teńgege artqan, dep habarlaıdy «QazAqparat» HAA tilshisi Qazaqstan qarjygerleri qaýymdastyǵyna (QQQ) silteme jasap.

Atalyp otyrǵandaı, zeınetaqy aktıvteri jınaǵy 2017 jyly 1306,48 mıllıard teńgege nemese 20,2 paıyzǵa kóbeıgen. Sonymen birge, memlekettik qundy qaǵazdardyń (MQQ) úlesi zeınetaqy portfelinde 46,1 paıyzdan 44,5-ke tómendegen.

 «Naqtyraq aıtqanda, QR Ulttyq bankiniń notalaryna salynǵan ınvestıtsııa 98,97 mıllıard teńgege (-16,7%) azaıǵan. QR-nyń bank sektoryna jalpy zeınetaqy jınaǵynyń 1659,7 mıllıard teńgesi: 328 mıllıard teńgesi salym retinde, 1235,9 mıllıardy oblıgatsııa jáne 95,9 mıllıardy úlestik quraldar retinde ınvestıtsııalanǵan», - delingen mátinde.

Qańtar aıynda ekinshi deńgeıdegi aktıvterdiń somasy 10,9 mıllıard teńgege, ıaǵnı 0,7 paıyzǵa artqan.

Shetel memleketteriniń MQQ-syna ınvestıtsııalyq portfeldiń 12,6 paıyzy, al QR kvazımemlekettik uıymdarynyń oblıgatsııalaryna 9,3 paıyzy tıesili. Sonymen birge, shet memleketterdiń MQQ-sy 36,1 mıllıardtan 984,9 mıllıard teńgege deıin ósse de, onyń qurylymy aıtarlyqtaı ózgeristerdi basynan keshirgen.

Osy jyldyń qańtar aıynda qordyń ınvestıtsııalyq túsimi 13,2 mıllıard teńgeni quraǵan. Ótken jyldyń qańtar aıynda ınvestıtsııalyq túsim 13,9 mıllıard teńgege teń bolyp, jyldyń sońyna qaraı 597,3 mıllıard teńgege deıin artqan bolatyn. Qańtar aıynda komıssııalyq qordyń syıaqysy 3,4 mıllıard teńgege teń bolyp, «taza» ınvestıtsııalyq kiristi 9,8 mıllıard teńgege jetkizgen.

BJZQ málimetine sáıkes, 2017 jyly salymshylardyń esebine bólingen zeınetaqy aktıvteriniń túsimdiligi 7,92 paıyzdy, al ınflıatsııa deńgeıinde 7,1 paıyzdy quraǵan.   

2018 jyldyń qańtar aıynda shottardyń sany 15,41 myńǵa azaıyp, 10 103,8 myń shotqa teń bolǵan. Sonymen qatar, jınaǵy bar shottar odan da kóp - 32,6 myńnan 9866,2 myńǵa deıin azaıǵan. Jalpy, Qazaqstan azamattarynyń zeınetaqy jınaǵy ótken aıda 26,28 mıllıard teńgege ósip, 7807,02 mıllıard teńgeni quraǵan.

«Jınaǵy bar shottardyń azaıýýy tólemderdiń ósimin týyndatty. Osylaısha, qańtar aıynda somalyq tólemder 48,95 mıllıard teńgege jetken. Al ótken jyly ortasha tólemderdiń mólsheri aı saıyn 17,59 mıllıard teńge deńgeıinde bolǵan edi. Alaıda mundaı dınamıka ótken jyldyń basynda da baıqalǵanyn atap ótýimiz kerek. Ol kezde qańtar aıynda tólemderdiń mólsheri 43,14 mıllıard teńge bolatyn», - dep habarlaıdy QQQ.