«BJZQ» AQ eks-basshylarynyń soty: 5 mlrd teńge qaıda ketkeni anyqtaldy
Sot aldynda «BJZQ» AQ eks-tóraǵasy Rýslan Erdenaev, «BJZQ» AQ táýekelderdi basqarý departamentiniń basshysy Musa Bahytov, «Alataý Munaı Altyn» AQ baqylaý keńesiniń tóraǵasy Baqytjan Kenjebaev, «Býzgýl Argým» JShS dırektory A.Naızaǵarın jaýap berip jatyr.
«Býzgýl Argým» JShS quryltaıshysy Baqytjan Kenjebaevtyń qorǵaýshysy Nellı Andronova daýǵa aınalǵan 5 mlrd teńgeniń qaıda ketkenin aıtyp berdi.
Onyń aıtýynsha, «BJZQ» «Býzgýl Aýrým» JShS-nan 5 mlrd teńgege oblıgatsııa satyp alǵan. Bul qarjy kásiporynnyń Azııa Kredıt Bankindegi shotynda saqtalyp tur.
«Depozıttegi aqshany kepildikke qoıyp Kenjebaev bankten nesıe alǵan. Bul aqsha kásiporynǵa óndiristik maqsatta jumsaldy. Nesıe ýaqytynda tólenip turǵan.
Tek Kenjebaev Germanııada ota jasatýǵa ketkende ǵana sál keshigip qaldy. «AsiaCreditBank» AQ kelisim sharttaǵy 8.1.6 pýnktin buzyp, klıenttiń kelisiminsiz zańmen kelisilgen 40 kún merzimge kútpeı shotqa arest qoıylatynyn bilip, aldyn ala aqshany banktiń óz qoryna aýdarǵan», - dedi Nellı Andronova.
Onyń aıtýynsha, «Býzgýl Aýrým» JShS men BJZQ arasyndaǵy azamattyq-quqyqtyq mámile zań normalaryna qaıshy kelmegenin saraptama dáleldegen.
Sonymen qatar, ol: «Baqytjan Kenjebaev ustalmaǵan jaǵdaıda aqsha qorǵa qaıtarylatyn edi», - dedi.
«Bul Kenjebaevtyń BJZQ-ǵa zııan keltirý týraly qylmystyq oı-pıǵyly bolmaǵanyn kórsetedi. Ol «Alataý Munaı Altyn» AQ-men oblıgatsııalardy kepildi túrde satyp alý týraly kelisimge kelmek boldy. 20 jeltoqsanda úshjaqty kezdesý ótti. Sonyń nátıjesinde aktsııalardy qaıta satyp alý týraly hattama jasaldy. 28 jeltoqsanda Kenjebaevty qamaýǵa almaǵan jaǵdaıda, 5 mlrd teńge qorǵa qaıtarylatyn edi», - dedi Andronova.
Qorǵaýshy Kenjebaevtyń ózin qýdalap jatqanyn estip, Germanııadan kelgen soń qamalǵanyn aıtty.
Onyń aıtýnysha, eger Kenjebaev kepilge bosatylsa, ol BJZQ oblıgatsııalaryn satyp alyp, BJZQ-nyń aqshasyn qaıtaratyn edi.
Osyǵan baılanysty QR QK 153-baby men 321-baby boıynsha Kenjebaevqa qatysty qýdalaýdy toqtatyp, qamaýdan bosatýdy suraımyn», - dedi ol.
Aıta keteıik, jyl basynda Ulttyq qaýipsizdik komıtetiniń Almaty qalasyndaǵy departamenti BJZQ-nyń quny 5 mlrd teńge bolatyn kelisimshartyn teksergen bolatyn. Ulttyq banktiń qatysýymen «Biryńǵaı jınaqtaýshy zeınetaqy qory» AQ-nyń áreketin tekserý ótken jyldyń 21 jeltoqsanynan bastalǵan.