Bizdiń muǵalimder álemdik deńgeıde tanylýǵa laıyq — Tatıana Beloýsova
ALMATY. KAZINFORM — Almatydaǵy № 95 mektep-lıtseıdiń hımııa páni muǵalimi Tatıana Beloýsova qazir Birikken Arab Ámirlikteriniń Dýbaı qalasynda júr. Onda Global Teacher Prize halyqaralyq baıqaýynyń marapattaý rásimi ótip jatyr. Ol Kazinform tilshisine bergen suhbatynda bul tájirıbeniń óz kásibı fılosofııasyna qalaı áser etkenin aıtyp berdi.
— Tatıana hanym, qazir Global Teacher Prize jobasynyń fınalyndasyz. Marapattaý rásimi qalaı ótip jatyr?
— Iá, Birikken Arab Ámirlikteriniń Dýbaı qalasynda 2026 jylǵy 2 aqpanda 50 fınalısti marapattaý rásimi ótti. Sol kúni top-10 muǵalim de tanystyryldy. Ókinishke qaraı, ózim bul tizimge enbedim. Kelesi kúni árqaısymyzǵa sertıfıkat berildi. Bul qujat bizdiń baıqaýdyń fınalısi ekenimizdi rastaıdy.
Sonymen qatar 2 aqpanda konkýrstyń 10 jyldyǵy da atap ótildi. Bul shara óte joǵary deńgeıde ótti, oǵan ıÝNESKO ókilderi men jobanyń jetekshileri qatysty.
— Jalpy baıqaýǵa qatysý protsesi qalaı ótti? Qandaı qıyndyqtarǵa keziktińiz?
— Halyqaralyq konkýrstyń aldynda ár elde ulttyq baıqaýlar uıymdastyrylady. Mysaly, 2024 jyly Qazaqstanda National Teacher Prize ótti. Sol baıqaýda men alǵashqy ondyqqa kirip, jeńimpaz atandym. Ulttyq komıtet sol tizimdi halyqaralyq konkýrsqa usyndy. Byltyr baıqaýǵa qatysyp, barlyq kezeńnen óttim, biraq tek álemniń úzdik 100 muǵaliminiń qataryna ene aldym. Bıyl ózim úmitker retinde qatysý jóninde sheshim qabyldadym. Konkýrsta mundaı múmkindik bar.
Baıqaýǵa qatysý úshin anketa toltyryp, esse jazyp, jetistikterdi qujat júzinde dáleldeýge tıissiń. Barlyq materıal muqııat tekseriledi. Mysaly, jasandy ıntellekt arqyly daıyndalǵan jaýaptar qabyldanbaıdy. Bıyl bastapqyda 38 myń úmitker qatyssa, tek 5 myń anketa tekserýden ótti. Solardyń arasynan suhbat arqyly fınalıster tańdaldy. Suhbattan ótip, bıyl fınalǵa shyqqanyma óte qýanyshtymyn.
— Sizdi fınalǵa deıin jetkizgen eń mańyzdy sát nemese sheshim qandaı boldy? Konkýrstyń ár kezeńinde pedagogıkalyq tájirıbeńizdi qalaı kórsetýge tyrystyńyz?
— Bul baıqaý tek synyptaǵy jumysty baǵalamaıdy, muǵalimniń jalpy pedagogıkalyq qyzmeti de eskeriledi. Ózimniń synyptan tys jumystarymdy da kórsetýge tyrystym. Qazaqstandaǵy hımııa páni oqýlyqtarynyń avtory retinde tájirıbemdi tanystyrdym, Ulttyq testileý ortalyǵymen birlesip tapsyrmalar daıyndaımyn, Almaty men respýblıka boıynsha muǵalimderge master-klastar ótkizemin.
Sonymen qatar hımııa páninen vıdeo-sabaqtar túsirip, YouTube, Instagram jáne TikTok sııaqty jelilerde jarııalaımyn. Qazirgi ýaqytta bul jobany barlyq platformada kúnine 25 myńǵa jýyq adam qaraıdy jáne onyń aýqymy 113 elge taralǵan.
— Bul baıqaýdaǵy jetistigińiz sizdiń muǵalim retindegi fılosofııańyzǵa nemese bolashaqtaǵy jobalaryńyzǵa qalaı áser etti?
— Fınalǵa shyǵý meniń pedagogıkalyq fılosofııama jáne kásibı josparlaryma aıtarlyqtaı áser etkeni sózsiz. Bul — men úshin jeke jetistik qana emes, sonymen qatar Qazaqstandy halyqaralyq deńgeıde tanytý múmkindigi. Bizdiń elden úsh muǵalim fınalǵa shyqty, bul elimizdegi pedagogterdiń joǵary kásibı deńgeıin kórsetedi.
Sondaı-aq konkýrsqa qatysý arqyly áriptesterime shabyt berip, bul tájirıbe jas muǵalimderge úlgi bolady dep úmittenemin.
— Jas muǵalimderge qandaı keńes beresiz?
— Meniń oıymsha, osyndaı halyqaralyq konkýrstarǵa qatysý óte mańyzdy. Bul tek jeke kásibı damýǵa emes, sonymen qatar Qazaqstannyń bilim júıesin dúnıe júzine tanytýǵa múmkindik beredi. Konkýrstarǵa qatysý arqyly muǵalim óz tájirıbesin kórsetýge, jańashyl ádis-tásilderin bólisýge, óz jumysyn obektıvti túrde baǵalaýǵa múmkindik alady.
Jas pedagogterge aıtarym — ózińizdi damytýdan, kásibı sheberlikti kórsetý múmkindiginen tartynbańyz. Qazaqstannyń muǵalimderi álemdik deńgeıde de tanylýǵa laıyq, sondyqtan tájirıbeńizdi kórsetýge, óz oqytý ádisterińizdi halyqaralyq arenada tanystyrýǵa tyrysyńyz. Mundaı qadamdar jeke kásibı ósýge ǵana emes, elimizdiń bilim salasynyń abyroıyn arttyrýǵa da úles qosady.
Eske salaıyq, Almatydaǵy № 95 mektep-lıtseıdiń hımııa páni muǵalimi Tatıana Beloýsova Global Teacher Prize 2025-2026 halyqaralyq baıqaýynyń qorytyndysy boıynsha álemniń eń úzdik 50 pedagoginiń qataryna endi.
Aıta keteıik, Qazaqstan bul bedeldi baıqaýǵa besinshi ret qatysyp otyr. Osy ýaqytqa deıin el ókilderi, bıylǵy nátıjeni qosa alǵanda, úsh márte álemniń úzdik 50 pedagoginiń qataryna engen.
Prezıdent Qasym-Jomart Toqaev Tatıana Beloýsovany osy jetistigimen quttyqtady.
— Bul joǵary baǵa — Sizdiń óskeleń urpaqqa taǵylymdy tárbıe men ozyq bilim berý isine sińirgen uzaq jylǵy eńbegińizdiń jemisi. Bizdiń maqsatymyz — zııatker ultqa aınalý. Sondyqtan memleket árdaıym muǵalimderdiń mártebesin kóterip, olardy jan-jaqty qoldaıdy, — dedi Qasym-Jomart Toqaev.