Bizdiń aýylǵa qaladan kóship kelip, kásip bastap jatqan adamdar bar — Gúljan Dosmaǵambetova
AQTÓBE. KAZINFORM — Ákimdik qyzmette 10 jyldan astam tájirıbesi bar Gúljan Dosmaǵambetova alǵashynda muǵalim bolyp, bala tárbıeledi. Keıin týǵan jerine oralyp, ustazdyq qyzmetin jalǵastyrdy. Kóp etnosty aýyldyń ákimi qazir eldimekenge qalalyqtardyń da kóship kelip jatqanyn aıtty. Aýyldyń ınfraqurylymyna qyzyǵatyndar men mal sharýashylyǵyn, ósimdik sharýashylyǵyn damytýdy kózdeıtin adamdar osy Qosestek aýyldyq okrýgin tańdaıdy. Kazinform tilshisi týǵan jerin bárinen bıik qoıǵan Gúljan Dosmaǵambetovamen suhbattasty.
— Aqtóbe jurty, onyń ishinde Qarǵaly aýdany sizdi jaqsy tanıdy. Ákim bop qyzmet etip júrgenińizge neshe jyl boldy?
— Men 2013 jyldan beri osy qyzmettemin. Ózim osy aýdannyń, osy aýyldyń týmasymyn. 1996 jyly Q.Jubanov atyndaǵy Aqtóbe pedagogıkalyq ınstıtýtyn bitirdim. Keıin qalada bir jyl muǵalim bolyp, aýdanǵa qonys aýdardym. Onda da mektep muǵalimi, dırektordyń orynbasary jáne dırektory qyzmetterin atqaryp, keıin usynys tústi. Sol kezde Qosestik aýylynyń ákimi boldym. Bir jyldan soń Qarǵaly aýdandyq bilim bólimine basshy qyzmetine aýysqanymmen, 2013 jyly qaıta aýylyma ákim boldym. Bul úlken jaýapkershilik. Ári elimizde aýyldyq okrýg ákimderiniń saılaýy ótkende, óz kandıdatýramdy usynyp, turǵyndar qoldaýyna ıe boldym. Men óz jerime, týǵan aýylyma qandaı da paıdamdy tıgizsem dedim.
— Aýylda qandaı is atqaryldy?
— 2016 jyly aýylǵa gaz qubyry tartylyp, turǵyndarǵa kógildir otyn berildi. 2018 jyly ortalyqtandyrylǵan sý qubyry júrgizildi. Al 2020 jyly balabaqsha kúrdeli jóndeýden ótip, aýyldaǵy kósheni jaryqtandyrý, jol salý jumystary júrgizildi. Qazirgi kezde bizdiń aýyldaǵy 16 kóshe bolsa, onyń teń jartysynda asfalt bar. Taǵy 4 kósheniń qurylysyna qajetti jobalyq-smetalyq qujatty ázirlep qoıdyq. Aýylda 2019 jyly mádenıet oshaǵy da salyndy. Sonymen birge ákimdik ǵımaraty jańardy. Bizde sport kesheni de boı kóterdi. Aýylymyzda saıabaq, skverimiz de bar. Balalar úshin oıyn alańy da salyndy.
— Aýyl halqy nemen aınalysady?
— Bizde 1600-den astam adam turady. Kóbi balabaqsha, mektep, klýb, kitaphana sekildi bıýdjettik mekemelerde eńbek etedi. Sonymen birge kásipkerlik salasy da jaqsy damyǵan. Shaǵyn jáne orta bızneste qyzmet kórsetý baǵyty oq boıy ozyq. Qosestektikter kólik jóndeý orny, jol boıyndaǵy kempıng, shashtaraz, sán salonyn ashyp qoıdy. Bizde 37 sharýa qojalyǵy da jumys istep tur. «Aýyl amanaty» jobasy bul baǵyttaǵy jumysqa úlken serpilis bergeni anyq. Barlyǵy 35 joba tapsyrylyp, onyń 30-y maquldandy.
— Qosestek — kóp etnosty aýyl. Munda ult arasyndaǵy tatýlyqtyń, birliktiń berik ekenin kórýge bolady. Syry nede?
— Shynynda da bizde ózge ult ókilderi kóp qonystanǵan. Turǵyndardyń 50 paıyzǵa jýyǵy ǵana qazaq bolsa, ózgesi orys, ýkraın, nemis, bashqurttar. Qandastarymyz da osynda turady. Sondyqtan bolar, aralas neke de kóp. Salt-dástúrge keler bolsaq, barlyq memlekettik, ulttyq merekelerdi toılaımyz. Bir-birimizdi jatyrqamaımyz, baýyrymyzdaı kóremiz. Aýylymyz ózi erekshe jerde ornalasqan. Myna jaqtan Aqtóbe qalasy jaqyn, ekinshi bólininde Reseı shekarasy. Sonymen birge aýyl ishinde ózen aǵyp jatyr. Ózen Qarǵaly sý qoımasyna quıady. Kóktemde qaýip tóndiretini ras. Biraq jyl saıyn tasqynnyń aldyn alý jumystaryn júrgizemiz. Qosestekte bulaq da kóp. Jastarmen birge jıylyp, kózin ashamyz. Halqymyz óte belsendi.
— Aýylǵa qyzyǵyp, kóship keletinder kóp pe?
— Kóship kelýshiler kóp. Keıbiri qaladan keldi. Olar bos kelmeı, kásip bastady. Kóbine mal sharýashylyǵy, óńdeý salasyn qolǵa aldy. Byltyr bir adam qaladan kelip, jylyjaı salyp jatyr.
— Jumys tártibińiz týraly aıtyp berińizshi… Іzdep keletinder kóp pe, álde siz aralap júrip, bárin bilip otyrasyz ba?
— Men aptasyna 7 kún, ár kúnde 24 saǵat jumys isteýge ázirmin. Kez kelgen ýaqytta telefon tutqasyn kóteremin. Barlyq jaýapty qyzmetker habarlasyp, mán-jaıdy aıtyp otyrady. Tańerteń ákimdikke bárinen buryn kelemin. Qujattardy rettep, jıyn ótkizemin. Al úıde anammen birge turamyn. Anam tamaǵymdy ázirlep, meni kútip otyrady. Bir aıta ketetinim, anamyz ekeýimizdiń hobbıimiz bar. Biz quraq quraımyz, jaqyndarymyzǵa syıǵa beremiz. Keshkilik quraq kórpe tigip júrmiz. Bul isti 2020 jyly qolǵa aldyq. Sebebi sol jyly pandemııa bolyp, ákem kóz jumdy. Anam ekeýimiz qaıǵyny kóterý úshin izgi ispen aınalysý kerek dep sheshtik. Anam ózi burynnan tigedi, sóıtip meni de úıretti. Ony jaqyndarymyzǵa syılaımyz. Ásirese qyzdarǵa taptyrmas dúnıe.
— Osy tusta ákimdik qyzmetti tastap, jańa salany tańdaǵyńyz kelgen kez boldy ma?
— Jumystyń jeńili joq. Ákim bolýdyń qıyn tustary da bar. Biraq maǵan óz jumysym unaıdy. Munda jumys nátıjesi kóz aldyńda kórinip turady. Basqa jumystarǵa da shaqyrdy. Men ózim týǵan jerimde eńbek etemin dep aıttym.
— Aýylda, týǵan jerińizde taǵy ne ózgeredi? Jobalaryńyz týraly aıtsańyz…
— Aýylda jaryqtandyrý, tasjol salý jumysy ári qaraı jalǵasady. Sonymen birge adamdar «Aýyl amanaty» jobasyna qatysyp, tabysyn arttyrsa deımin. Bir ǵana jalaqyǵa qarap otyrǵan da durys emes. Al bul joba kásippen aınalysýǵa múmkindik berdi. Máselen eden jýýshylar 85 myń teńge jalaqy alsa, otbasy úshin qıyn. Al qosymsha kásip bastasa, áleýmettik jaǵdaıy jaqsarady. Qazir bizde qus sharýashylyǵy, jylyjaımen qatar damyp keledi. Bıyl mal sharýashylyǵy baǵytynda 5 joba ázirlendi. Ózim aýyldyń eki chatynda barmyn. Adamdarmen tikeleı sóılesip, keıbir suraqty talqylap otyramyn.
— Іsińizge sáttilik tileımin.
