Biz prokýratýranyń bıýdjet qarajatyn tekserýin qoldaımyz – Pavlodar oblysynyń ákimdigi
PAVLODAR. KAZINFORM - Pavlodar oblysynyń ákimdigi «Qýatty óńirler – el damýynyń draıveri» Ulttyq jobasyn iske asyrý aıasynda bólingen bıýdjet qarajatyn urlaý faktileri boıynsha túsindirme aqparat berdi.
Buǵan deıin Pavlodarda qonys aýdarýǵa bólingen qarajat jymqyrylǵany týraly habarlaǵan edik. Prokýrorlar tek 6 aýdan boıynsha 600 mln teńge shyǵyndy anyqtaǵan. Atalǵan jaıt boıynsha Pavlodar oblysynyń ákimdigi túsindirme aqparat berdi.
«Jaqynda buqaralyq aqparat quraldarynda jáne áleýmettik jelilerde Pavlodar oblysynda azamattardy jumys kúshi artyq ońtústik óńirlerden jumys kúshi tapshy respýblıkanyń halyq sany az qonystanǵan soltústik eldi mekenderine kóshirý jobasyn iske asyrý aıasynda bólingen bıýdjet qarajatyn jymqyrý faktileriniń anyqtalǵany týraly aqparat taraldy. Osyǵan oraı, túsindirme aqparat berýdi qajet dep sanaımyz. Atalǵan joba aıasynda Pavlodar oblysyna 20 myńǵa jýyq qonys aýdarýshylar men qandastar kóship keldi. Olardyń 48%-y ártúrli biliktiligi bar eńbekke qabiletti jastaǵy adamdar. Kelgenderdiń jartysy – mektep jasyna deıingi jáne mektep jasyndaǵy balalar. Balalardyń kelýi aýyl mektepterindegi oqýshylar sanynyń kóbeıýine oń áserin tıgizdi, keıbir jaǵdaılarda mektepterdiń jabylýynyń aldyn alyp qaldy. Máselen, Aqqýly aýdanynyń Maıqaraǵaı aýylynyń mektebinde 26 bala oqydy, sońǵy eki jyl ishinde mundaǵy oqýshylardyń sany 69-ǵa deıin ósti. Sharbaqty aýdanynyń Shegiren aýylynda oqýshylar sany 70-ten 140-qa deıin ósti. Qonys aýdarý jobasyn iske asyrý Aqtoǵaı aýdanynyń Barlybaı aýylynda, Tereńkól aýdanynyń Jańaqurylys aýylynda, Ýspen aýdanynyń Olgıno, Beloýsovka, Qarataı, Konstantınovka aýyldarynda jáne t. b. oqýshylar sanynyń ósýine áser etti», - delingen aqparatta.
2017-2023 jyldar aralyǵynda qonys aýdarýshylardyń turǵyn úıdi jalǵa alý shyǵyndary ótelgen. Tólem mólsheri 15-ten 30 AEK-ke deıin boldy. 2023 jyldan bastap turǵyn úı satyp alý nemese salý úshin qonys aýdarýshylarǵa qarjylaı kómek kórsetýge múmkindik beretin memlekettik ekonomıkalyq utqyrlyq sertıfıkaty engizilgeni málim. Sertıfıkat turǵyn úı qunynyń 50%, biraq, 1160 AEK-ten aspaıtyn mólsherde beriledi. Ótken jyly óńirdiń mansap ortalyqtary osyndaı 542 sertıfıkat berip, olar boıynsha 1,9 mlrd teńge qarajat tólengen.
«Ókinishke qaraı, qazirgi ýaqytta úılerdi satýshylar men qonys aýdarýshylar arasynda úılerdiń baǵasyn kóterý týraly ózara kelisý jaǵdaılary anyqtalyp jatyr. Alaıda ekonomıkalyq utqyrlyq sertıfıkattaryn berýde jumys organy bolyp tabylatyn mansaptyq ortalyqtardyń fýnktsıonalynda mundaı faktilerdi anyqtaýǵa jáne jolyn kesýge quqyqtyq ókilettikteri joq. Biz prokýratýra organdarynyń qonys aýdarýshylardyń alǵan bıýdjet qarajattaryn tekserýge aralasýyn quptaımyz jáne olarǵa jan-jaqty qoldaý kórsetemiz», - dep málimdedi óńirlik ákimdikten.
Aqparatta sondaı-aq memlekettik qyzmetshilerdiń jyljymaıtyn múlikke joǵary baǵalardy kórsete otyryp kelisimsharttar jasasý, sertıfıkattardy zańsyz berý jáne olar boıynsha júrgizilgen tólemderdi jymqyrýǵa qatysy bary jóninde shaǵymdar joq ekeni atap ótilgen.
