Biz dańqty kóshpendilerdiń muragerimiz, batyr babalardyń urpaǵymyz – Qasym-Jomart Toqaev
ASTANA. KAZINFORM – Memleket basshysy dúnıejúzilik kóshpendiler oıyndarynyń birlik pen tatýlyqtyń toıy ekenin atady.
«On jyl buryn osy jarysty alǵash uıymdastyrǵan qyrǵyz baýyrlarǵa alǵys aıtamyn. Bul ulttyq sport túrlerinen ótetin álemdegi eń iri doda, ony kóshpendiler Olımpıadasy deýge bolady. Bul oıyndar dala órkenıetiniń jer jahanǵa pash etedi. Sport ózara qurmet pen syılastyq sımvoly. Sporttyń basty mıssııasy halyqtar dostyǵyn nyǵaıtý. Qazaqstan búkil álemge beıbitshilik pen kelisim mekeni retinde tanymal. Elimizde túrli etnos ókilderi tatý-tátti ómir súrip jatyr. Biz alys-jaqyn sheteldermen tyǵyz baılanys ornattyq. Basqa memleketter de ózara dostyq qarym-qatynasta bolǵanyn qalaımyz, sondyqtan kóshpendiler oıyndary yntymaǵymyzdy bekemdeı túspek. Qurmetti dostar, Uly Dala dúbiri elimiz úshin tarıhı oqıǵa. Saryarqanyń saıyn dalasy bes kún boıy dúbirge tolady. Kúlli álem jurty naǵyz kóshpendilerdiń bolmysyna kýá bolady. Bul birlik pen tatýlyqtyń toıy. Dostyǵymyz máńgi bolsyn. V dúnıejúzilik kóshpendiler oıyndaryn ashyq dep jarııalaımyn», - deıdi Memleket basshysy.
«Kóshpendilerdiń uly kóshi eshqashan toqtamaıdy. Myńdaǵan jylǵa jalǵasqan osy kósh qazir basqasha sıpatqa ıe boldy. Kóshpendi ómir salty qaıta jańǵyrdy. Jahandaný dáýirinde eshqandaı shekara joq. Bir sózben aıtsaq, qazir zamanaýı kóshpendiler paıda boldy. Biz bilim alý, jumys isteý úshin qonys aýdaramyz, basqa elderge saıahat jasaımyz. Bul dáýirde biz erkindik rýhyn saqtaı bilýimiz kerek. Jańa zamannyń jaqsy qasıetterin boıǵa sińirý qajet. Biz dańqty kóshpendilerdiń muragerimiz, batyr babalardyń urpaǵymyz. Olar el men jerdi qorǵap ulanǵaıyr dalany bizge amanat etti. Osy qasterli murany kózdiń qarashyǵyndaı saqtap, jas býynǵa tabystaý bárimizge ortaq paryz», - dedi Memleket basshysy Qasym- Jomart Toqaev.
Prezıdenttiń aıtýynsha, kóshpendiler oıyndary ıgi maqsattan týyndaǵan biregeı joba.
