Bıýdjet kodeksiniń jobasyna memlekettik qaryzdyń máselesin sheshýge arnalǵan túzetýler engiziledi
«Birinshiden, ekonomıkany damytýdyń negizgi sharttarynyń biri – makroekonomıkalyq turaqtylyqty qamtamasyz etý. Ulttyq ekonomıka, Aýyl sharýashylyǵy jáne Saýda mınıstrlikteri qazirgi syn-qaterlerdi eskere otyryp, ınflıatsııa deńgeıin baqylaý jáne tómendetý jónindegi sharalardy iske asyrýdyń tıimdiligin arttyrýy qajet. Taǵy da eske salamyn, bizdiń mindetimiz – bıyl ınflıatsııany 2 ese tómendetý. Ekinshiden, ınvestıtsııa tartý jumysyn kúsheıtý qajet. Syrtqy ister mınıstrligi múddeli memlekettik organdarmen birlesip, ınvestıtsııa tartý rásimderindegi qordalanyp qalǵan júıelik problemalarǵa jan-jaqty taldaý júrgizýi tıis. 1 aı merzimde olardy joıý jóninde naqty usynystar engizý kerek. Úshinshiden, shaǵyn jáne orta kásipkerlik ekonomıka men eńbek naryǵynyń qozǵaýshy kúshi bolýy tıis. Ulttyq ekonomıka mınıstrligi Shaǵyn jáne orta bıznesti qoldaý boıynsha keshendi jospar ázirleýi kerek. Bul jumys «Atameken» palatasymen jáne múddeli memlekettik organdarmen ózara birlesip atqarylýy tıis», - dedi Á. Smaıylov.
Sonymen qatar Premer-Mınıstr Úkimet múddeli organdarmen jáne «Atameken» ulttyq palatasymen birlesip, jańa Bıýdjet jáne Salyq kodeksterin ázirlep jatqanyn eske saldy. Bul turǵyda túsinikti jáne boljamdy fıskaldyq saıasat eskerilýi kerek.
«Ulttyq ekonomıka jáne Qarjy mınıstrlikteri qosylǵan qun salyǵynyń ári korporatıvtik tabys salyǵynyń mólsherlemelerin saralaý boıynsha usynystar ázirleýi kerek. Bıýdjet kodeksiniń jobasynda memlekettik boryshtyń ósý problemalaryn sheshýge, Ulttyq qordan beriletin transfertterdi tómendetýge, sondaı-aq barlyq deńgeıdegi bıýdjetterdi ıgerýdiń tıimdiligin arttyrýǵa baǵyttalǵan túzetýler kózdelýi tıis. Qarjylyq tártipti kúsheıtip, bıýdjet júıesiniń ashyqtyǵyn, sondaı-aq memlekettik shyǵystardyń tıimdiligin arttyrý kerek», - dedi Premer-Mınıstr.
