Bıýdjet qarajatyn tıimsiz paıdalaný praktıkasy jalǵasyp keledi - Amanjan Jamalov
«2020 jyly COVID-19-ǵa qarsy kúreske 6,9 trln teńge, onyń ishinde respýblıkalyq bıýdjetten 3,5 trln teńge bólindi. Bul somalar qalaı ıgerildi? Esep komıtetiniń derekteri boıynsha olardy ıgerý kezinde kóptegen talaptardy buzýshylyqtarǵa jol berilgen. Meniń áriptesterim daǵdarysqa qarsy sharalarǵa bólingen shyǵystar tıimdiliginiń tómen ekendigi týraly birneshe ret aıtty. Bul – «Jumyspen qamtýdyń jol kartasyna», «Bıznestiń jol kartasyna» jáne taǵy basqa jobalarǵa qatysty», - dedi A. Jamalov Úkimet pen Esep komıtetiniń 2020 jylǵa arnalǵan respýblıkalyq bıýdjettiń atqarylýy týraly esepterin qaraý kezinde.
Sonymen qatar depýtat bıýdjet qarajatyn tıimsiz paıdalaný praktıkasy jalǵasyp otyrǵanyn aıtty.
«2020 jyly ol 569 mlrd teńgeni qurady, ıaǵnı 2019 jylǵa qaraǵanda 33%-ǵa artyq. Onyń 10 paıyzy, ıaǵnı 56 mlrd teńgesi kvazımemlekettik sektorǵa qatysty. Bir qaraǵanda, olaı bolýy múmkin emes bolyp kórinedi, óıtkeni olar bıýdjettik uıymdar emes, kásipkerlik sýbektileri», - dedi ol.
A. Jamalovtyń paıymynsha, ótken jyldardaǵydaı strategııalyq jáne bıýdjettik josparlaý arasynda tıisti ózara baılanystyń bolmaý problemasy saqtalyp otyr.
«Kóbinese memlekettik organdar ózderine ońaı kórsetkishterdi belgileıdi. Mysaly, qanaǵattaný deńgeıi, sapa deńgeıi, qoldaý deńgeıi. Olardyń negizi – áleýmettik zertteýler. Olardy memlekettik organdardyń taǵy da bıýdjet qarajatyna júrgizedi. Ókinishke qaraı, Úkimet áli kúnge deıin strategııalyq maqsattar men bıýdjet shyǵystarynyń tıimdiligin baǵalaıtyn ádistemeni qabyldaǵan joq, ol bıýdjettiń atqarylý sapasyna áser etedi», - dedi depýtat.
Aıta keteıik, búgin Parlament palatalarynyń birlesken otyrysynda Úkimet pen Esep komıtetiniń 2020 jylǵa arnalǵan respýblıkalyq bıýdjettiń atqarylýy týraly esepteri qabyldandy.
