Bıýdjet qarajatyn ıgere almaǵan mınıstrlikter men ákimdikter ataldy

ASTANA. QazAqparat – Bıyl 8 aıda memlekettik bıýdjet shyǵystary 98,6 paıyzǵa oryndaldy. Bul týraly Úkimet otyrysynda Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

Mınıstrdiń dereginshe, 8 aıda memlekettik bıýdjettiń shyǵystary - 98,6, respýblıkalyq bıýdjettiń shyǵystary – 99,3, jergilikti bıýdjetterdiń shyǵystary 98,3 paıyzǵa oryndaldy. Respýblıkalyq bıýdjet boıynsha somasy 14,5 trln teńgege shyǵystar júrgizildi.

«Atqarylmaý 107 mlrd teńgeni, onyń ishinde únemdeý 21 mlrd teńgeni qurady. Igerilmegeni – 86 mlrd teńge. Igerilmeýdiń neǵurlym iri somalary Tótenshe jaǵdaılar, Ekologııa jáne tabıǵı resýrstar, Týrızm jáne sport, sondaı-aq Іshki ister mınıstrlikterinde qalyptasty. Igerilmeýdiń negizgi sebepteri: konkýrstyq rásimderdi uzaq merzimde ótkizý; sharttardy, qosymsha kelisimderdi jasasý rásimderin der kezinde ótkizbeý; shot-faktýralarmen atqarylǵan jumys aktilerin ýaqtyly usynbaý jáne basqalary», - dedi ol.

Onyń atap ótýinshe, jergilikti bıýdjetterdiń shyǵystary 7,7 trln teńgeni qurady. Atqarylmaǵany - 131 mlrd teńge.

«Bıyl óńirlerge 2 trln teńgege jýyq nysanaly transfertter kózdelgen. Olarǵa 1 qyrkúıekke 990 mlrd teńge bólingen. Onyń 96,8 paıyzy ıgerilgen. Atqarylmaǵany – 32 mlrd teńge, onyń ishinde 1 mlrd teńge – únemdeý, 31 mlrd teńge ıgerilmegen. Eń kóp ıgerilmeý Astana qalasy, Atyraý, Almaty jáne Batys Qazaqstan oblystarynda qalyptasty», - dedi Erulan Jamaýbaev.