Bıýdjet-2024: Birqatar mınıstrliktiń shyǵyndary azaıdy
ASTANA. KAZINFORM – QR Qarjy mınıstrligi 2024 jylǵa arnalǵan respýblıkalyq bıýdjettiń kórsetkishterine túzetýler engizdi. Tıisti qaýly «Ashyq zańdy tulǵalar» portalynda jarııalandy.
Eń kóp bıýdjettik qysqartýlar Qarjy naryǵyn retteý jáne damytý agenttiginde (5,9 mlrd teńge), Kólik mınıstrliginde (3,8 mlrd teńge) jáne Tsıfrlyq damý mınıstrliginde (1,9 mlrd teńge) tirkeldi.
Al, Syrtqy ister mınıstrligi syrtqy saıası qyzmetti úılestirýge shyǵystardy 366 mln teńgege, sondaı-aq QR azamattarynyń shetelde quqyqtary men múddelerin qorǵaý sharalaryna bólingen qarjyny 6 mln teńgege qysqartýdy josparlap otyr. Dese de, Syrtqy ister mınıstrligi sheteldik issaparlarǵa jáne halyqaralyq uıymdarda eldiń múddesin qorǵaýǵa jumsalatyn shyǵyndardy, sáıkesinshe, 142 mıllıonǵa jáne 49 mıllıonǵa ulǵaıtpaq.
QR Qorǵanys mınıstrligi óz shyǵystaryn 118 mln teńgege qysqartady. Qysqartý Qarýly Kúshterdiń jaýyngerlik ázirligin qamtamasyz etýmen baılanysty.
Al, joǵary jáne orta arnaýly bilimi bar mamandardy daıarlaýǵa arnalǵan bıýdjetti 229 mln teńgege ulǵaıtý josparlanǵan.
Quqyq qorǵaý organdary salasyna toqtalsaq, Ulttyq qaýipsizdik komıtetiniń bıýdjeti 98 mıllıon teńgege qysqartyldy.
Al, Qarjy monıtorıngi agenttiginiń sybaılas jemqorlyq qylmystarymen kúresýge jumsaǵan shyǵyny 300 mıllıon teńgege ósti.
Energetıka mınıstrligi gaz tasymaldaý júıesin damytýǵa beriletin nysanaly transfertterdi 464 mln teńgege, Indýstrııa jáne qurylys mınıstrligi turǵyn úı-kommýnaldyq sharýashylyqqa jumsalatyn shyǵyndardy 2 mlrd teńgege qysqartqanyn atap ótken jón.
Vedomstvolyq bıýdjetterdiń jappaı qysqartylýyna qaramastan Tsıfrlyq damý mınıstrligi «Elektrondyq úkimetti» damytýǵa 3,9 mlrd teńge bóldi.
Týrızm jáne sport mınıstrligi buqaralyq jáne ulttyq sportty damytýǵa bólingen qarajattyń 41 mıllıon teńgesin, al Mádenıet mınıstrligi azamattyq qoǵam ınstıtýttaryn nyǵaıtýǵa jáne qoǵamdyq sanany jańǵyrtýǵa bólingen qarjynyń 325 mıllıon teńgesin qysqartty.
Úkimet rezervi 6,5 mlrd teńgege ulǵaıtyldy.
Ózgeristerge qaramastan, 2024 jylǵa arnalǵan bıýdjet shyǵystarynyń kólemi ózgerissiz qaldy.
