Byltyr Almatyǵa 1,8 mln týrıst keldi

ALMATY. QazAqparat - Almatydaǵy týrızm pandemııaǵa deıingi deńgeıge oraldy. Bul týraly máslıhattyń VI sessııasynda qalalyq ekonomıka basqarmasynyń basshysy Dastan Ómirbaev aıtty, dep habarlaıdy QazAqparat tilshisi.

Onyń aıtýynsha, byltyr megapolıske 1,8 mln týrıst keldi. Bul 2021 jylmen salystyrǵanda 48 %-ǵa artyq.

«Týrıstik lektiń ulǵaıýy tıisti ınfraqurylymnyń damýyna ákeldi. Ótken jyly megapolıste 2,2 myń tósek- orynǵa arnalǵan 14 jańa qonaq úı kesheni ashyldy. Qala taý týrızmi arqyly sheteldikter úshin tartymdy. Ótken jyly uzyndyǵy 150 km 12 marshrýt pen 3 kempıng aımaǵyn abattandyrý jumystary aıaqtaldy»,- deıdi Dastan Ómirbaev.

Almaty qalalyq ákimdiginiń málimetinshe, jyl basynan beri megapolıske 197 myńnan astam sheteldik týrıst kelgen.

Buǵan deıin saıahattap kelgen týrıster men qala qonaqtary qaı jerlerge kóbirek baratyny týraly jazǵan edik.