BUU: Ýgandada 2 mıllıon bosqynǵa qaýip tónip tur

ASTANA. KAZINFORM – BUU Bosqyndar isteri jónindegi Joǵarǵy komıssary basqarmasy Ýgandada shamamen 2 mıllıon bosqynnyń shuǵyl gýmanıtarlyq kómekke bólinetin qarajattyń qysqarýy men tıisti qyzmetterdiń buzylýyna baılanysty qaýip-qater aldynda turǵanyn málimdedi, dep habarlaıdy Anadoly.

BUU Bosqyndar isteri jónindegi Joǵarǵy komıssary basqarmasy Ýgandadaǵy gýmanıtarlyq jaǵdaıǵa baılanysty jazbasha málimdeme jasady.

— Shamamen 2 mıllıon bosqyn qaýip aldynda tur, óıtkeni Ýgandanyń shuǵyl qorlary azaıyp, tıisti qyzmetter buzylyp jatyr. Sýdan, Ońtústik Sýdan jáne Kongo Demokratııalyq Respýblıkasyndaǵy kúsheıip kele jatqan daǵdarys júzdegen adamdy kún saıyn shekaradan ótip, qaýipsizdik pen ómirlik mańyzy bar kómek izdeýge májbúr etip otyr. Osy sebepterge baılanysty Ýgandaǵa kelip jatqan bosqyndar sany 2 mıllıonǵa jetti, — delingen málimdemede.

Qujatqa sáıkes, 2025 jyldyń basynan beri elge kún saıyn orta eseppen 600 bosqyn kelýde, al jyl sońyna qaraı bul kórsetkish 2 mıllıon adamǵa jetedi dep kútilýde.

— Ýganda — Afrıkadaǵy bosqyndardy eń kóp qabyldaıtyn el jáne álem boıynsha bosqyndardy qabyldaý jóninen úshinshi orynda. Qazirgi tańda el 1,93 mıllıon bosqyndy panalatyp otyr, olardyń bir mıllıonynan astamy — 18 jasqa deıingi balalar. Adamitarian kómekti uıymdastyrý sharalary sońǵy jyldardaǵy eń aýyr qarjylyq daǵdarystardyń birine tap boldy, — dep atap kórsetilgen BUU Bosqyndar isteri jónindegi Joǵarǵy komıssary basqarmasy málimdemesinde.

Málimdemede qazirgi tańda Ýgandanyń bosqyndarǵa kómek kórsetý sharalarynyń tek 25 paıyzy ǵana qarjylandyrylyp otyrǵany aıtylyp, halyqaralyq qaýymdastyqty jedel ári turaqty qoldaý kórsetýge jáne yntymaq tanytýǵa shaqyrý jasaldy.