BUU: Sýdanda 21,2 mıllıon adam aýyr ashtyqqa tap bolyp otyr

ASTANA. KAZINFORM — Birikken Ulttar Uıymy Sýdanda ásker men Jedel áreket etý kúshteri (HDK) arasyndaǵy úsh jylǵa jýyq ýaqyttan beri jalǵasyp kele jatqan qaqtyǵys saldarynan 21,2 mıllıon adamnyń aýyr ashtyq jaǵdaıyna ushyraǵanyn habarlady. Bul týraly Anadolý jazdy.

BUU bul másele boıynsha amerıkalyq X áleýmettik jelisinde esep jarııalady.

Jarııalanǵan málimette úsh jylǵa jýyq ýaqytqa sozylǵan qaqtyǵystardyń saldarynan 21,2 mıllıon adamnyń ashtyqqa ushyraǵany aıtylǵan:

«Eki óńirde ashtyqtyń bar ekeni rastaldy. Sonymen qatar qaqtyǵystar báseńdegen aımaqtarda BUU-nyń Dúnıejúzilik azyq-túlik baǵdarlamasyna (WFP) qoljetimdilik keńeıip, ashtyq deńgeıi tómendedi».

Sýdandaǵy qaqtyǵys

2023 jylǵy 15 sáýirden bastap Sýdanda ásker men shetelden qoldaý tapqan Jedel áreket etý kúshteri (JÁK) arasynda qııan-keski qaqtyǵystar bolyp jatyr.

Eldiń batysyndaǵy eń iri qala Fashır aýyr shaıqastardan keıin JÁK baqylaýyna ótti.

Qaqtyǵystar saldarynan ondaǵan myń adam qashýǵa májbúr bolǵan bul qalada JÁK beıbit turǵyndardy kúshtep kóshirip, qarýsyz kóptegen adamdardy óltirip, azaptaǵan. Bul áreketter Jedel áreket etý kúshteriniń músheleri jarııalaǵan beınejazbalarda kórsetilgen.

Aıta keteıik, AQSh prezıdenti Donald Tramp Sýdandy «jer betinde zorlyq-zombylyq eń kóp jasalatyn jer» dep atap, eldegi soǵysty toqtatatynyn málimdegen. 

Al BUU Sýdan halqynyń úshten eki bóligi gýmanıtarlyq kómekke zárý ekenin habarlap, dabyl qaqty.