BUU shtab-páterinde qazaqstandyq JOO-nyń jańa damý úlgisi tanystyryldy
Forýmǵa qatysýshylar «Ýnıversıtet 4.0.» atty qazaqstandyq joǵary oqý ornynyń jańa damý úlgisimen tanysty. Bul joba «Bolashaqqa baǵdar: rýhanı jańǵyrý» memlekettik baǵdarlamasyna negizdelip jasalǵan.
QazUÝ rektory óz sózinde uly fılosof Ál-Farabıdiń ıdeıasyna negizdelgen ýnıversıtettiń 4.0 jańa modelin tanystyrdy. Qazaqstandyq joǵary oqý ornynyń bul jańa úrdisine Birikken Ulttar Uıymy Órkenıetter alıansynyń Joǵarǵy ókili Nasır Abdýlazız ál-Naser qoldaý kórsetti. Ol osy bastamanyń mańyzdylyǵyna toqtaldy jáne álemniń basqa da ýnıversıtetterin BUU-nyń «Jahandyq azamattyq» baǵdarlamasy aıasynda jastardy tárbıeleýge naqty qadamdar jasaý úshin biriktirýge shaqyrdy.
«QazUÝ-dyń tájirıbesi men bastamalary BUU-nyń «Akademııalyq yqpaly» ǵalamdyq habynyń baǵdarlamalary úshin ózekti ári suranysqa ıe. Al Ál-Farabı murasy búgingi kúnge deıin bilimniń kemel kúshi bolyp tabylady», - dedi BUU Órkenıetter alıansynyń Joǵarǵy ókili Nasır Abdýlazız ál-Naser.
Al Ál-Farabı atyndaǵy QazUÝ rektory Ǵalym Mutanov: Qazirgi zamanda ýnıversıtetterdiń ári qaraı damý evolıýtsııasynda qandaı model bolýy kerek? Sol sebepti bizdiń tarapymyzdan «Ýnıversıtet 4.0» degen jańa model usynyldy. Qazirge deıin bilim-ǵylym mańyzdy bolyp kelse, qazirgi baǵytta rýhanı baılyq, jastardyń boıyna rýhanı qundylyqtardy sińdirý - sol baǵytta ózimizdiń úlgimizdi kórsetip, jaqsy qoldaý taýyp jatyrmyz», - dedi.
«Ýnıversıtet 4.0» úlgisi aıasynda Qazaq ulttyq ýnıversıteti «Al-Farabi university smart city» biregeı jobasyn júzege asyryp jatyr. Sondaı-aq BUU Bas assambleıasynyń 66-sessııasynda Qazaqstan Prezıdenti usynǵan «Jasyl kópir» bastamasyn iske asyrýǵa baǵyttalǵan «Jas urpaq arqyly jasyl kópir» baǵdarlamasy iske qosylmaq.
