BUU sessııasyna kelgen prezıdentterge qandaı as máziri usynylady
BUU bas aspazy Den Lopes BUU hatshylyǵynyń Nıý-Iorktegi qyzmetkerleriniń kúndelikti tamaǵyna jaýapty. Jyl saıyn qyrkúıekte BUU aspazdary Bas Assambleıaǵa kelgen ártúrli memleket jáne úkimet basshylaryna arnap túski as ázirleıdi. Lopestiń aıtýynsha, osy bir kúngi as daınydaý onyń kúndelikti jumysynan qıyn bolmasa, ońaı emes.
«170-190 memleket basshysyna usynylatyn asty ázirlegennen bir mezette tórt myń adamnyń qarnyn toıǵyzǵan ońaıyraq. Óıtkeni ádette qaýipsizdik talaby munshalyqty qatań bolmaıdy», - deıdi ol.
Mázir týraly kim sheshim qabyldaıdy?
Ár eldiń basshysy – ár alýan mádenıettiń adamy. Olardyń ulttyq taǵam dástúrleri de, jeke bastarynyń talǵamy da árkelki bolatyny túsinikti. Aspaz sonyń báriniń kóńilinen qalaı shyǵyp júr? Den Lopes osyny da taratyp aıtty.
«Negizinde biz Hattama qyzmetiniń nusqaýlaryna súıenemiz. Meniń mindetim – birneshe túrli jeńil tamaq, negizgi tamaq jáne táttiler ázirleý. Hattama qyzmetkerleri sharaptar men tamaqtyń dámin tatyp kóredi, lanchqa ne ázirleıtinimizdi aıtady», - dedi bas aspaz.
Prezıdentter qandaı taǵamdardy unatady?
Den Lopestiń sózine qaraǵanda, keıde degýstatsııa men talqylaý tórt saǵatqa deıin sozylatyn kórinedi. Negizgi mázirden tys, ózi bas bolyp áriptesterimen birge belgili bir dıeta ustaıtyndarǵa arnaıy tamaq pisiredi.
«BUU-da olar kóbinese frantsýz ashanasyn unatady. Biz veal en papillote, chicken mousseline, fýa gra ázirledik. Prezıdentter qoıdyń etin, jas maldyń etin súısinip jeıdi, fıle mınondy unatady, áıteýir men osynda jumys istegeli 15 jyldan beri osylar mázirde boldy. Biz munda balyqtan tamaq pisiremiz, vegetarıan astaryn ázirleımiz».
Báriniń birdeı kóńilinen shyǵý úshin ár alýan ulttyń ashanasyn bilý qajet. BUU bas aspazy da biraz eldi aralaǵan: Italııada bolǵan, Frantsııa, Belgııany aralaǵan, Qytaıǵa barǵan.
Prezıdentterdiń túski asy BUU jańa máziri talqylanatyn qańtar aıynan bastap oıda júredi. Maýsymǵa deıin taǵamdardyń aldyn ala tizimi anyqtalady, al shildeniń aıaǵyna qaraı Hattama qyzmetkerlerimen birge sońǵy sheshim qabyldanady. Den Lopes asqa daıyndyq eki kún buryn bastalatynyn da aıtty.
Álem lıderleriniń túski asyn kim uıymdastyrady?
Fernando Barkın attaı 20 jyldan beri osynaý ulan-asyr asty uıymdastyryp keledi. Barkınniń aıtýynsha, jyl boıǵy jumystyń eń qaýyrt shaǵy – osy kez. «AQSh prezıdentine tamaq bererde qaýipsizdik sharalary barynsha qataıady. Azyq-túlik tıelgen júk kólikteri BUU aýmaǵyna tek tańǵy tórt pen altynyń arasynda ǵana kire alady», - deıdi ol.
«As beriletin kúni jumysqa tańǵy beste kelemin, al tústen keıin jyldam ashanany retke keltirýge kirisemin. Óıtkeni ol jerde basqa is-sharalar da bolyp jatady», - deıdi Barkın. Ashanany retke keltirý úshin tańǵa deıin jumys isteýge týra kelýi múmkin. Keıde Barkın BUU-da qonyp qalady, úıine tek dýshqa túsip, bir shynyaıaq kofe ishý úshin ǵana barady.
Aspazdardyń ózderi ne oılaıdy?
Den Lopesti, onyń áriptesterin osynshama jaýapty oqıǵa qanshalyqty abyrjytady? «As tartylatyn kúni tolqıtynymyz anyq qoı. Óıtkeni barlyǵyn búge-shigesine sheıin umytpaı qyzmet etý kerek. Biraq biz únemi onyń údesinen shyǵamyz, tipti oqys jaǵdaılarǵa da daıyn turamyz. Komandam myqty, olarǵa árdaıym arqa súıeýge bolady», - deıdi Lopes.
Álem basshylarynyń qyzmetinde júrgenderdiń biri – metrdotel Muhamed Maher. Ol neshe prezıdentke as tartqanyn umytyp ta qalypty. «Esimde, prezıdent Klınton únemi ázildesetin. Ásirese Qytaı prezıdentimen jáne Bas hatshymen. Biz de onymen bir-eki ret ázildeskenbiz», - dep máz bolady Maher.
Muhamedtiń basty mindeti – daıashylarǵa bas bolý, as kezegi artyq shýsyz ótýin uıymdastyrý, joǵary mártebeli qonaqtarǵa sharap pen tiskebasar der kezinde tartylýyn qadaǵalaý. «Bizdiń baǵymyz jandy, óıtkeni memleket basshylaryna qyzmet etemiz. Kóz aldyńda kúlli álem turǵandaı sezinesiń. Bul biz úshin zor abyroı, sondyqtan olar razy bolýy úshin barymyzdy salamyz», - dep aǵynan jaryldy.
Daıashylar men hattama qyzmetkerleri BUU Bas Assambleıasyndaǵy delegatsııa basshylaryna túski as berý úshin dastarqan jaıyp jatyr.
Foto: BUU/K.Hoton.
