BUU: Nıgerııada 600 myńnan astam bala ashtyqtan ólip ketýi múmkin
ASTANA. KAZINFORM — Nıgerııanyń soltústik-shyǵysyndaǵy terrorıster belsendi áreket etip júrgen Borno, Adamava jáne Iobe shtattarynda gýmanıtarlyq daǵdarys údeı tústi, dep habarlaıdy Anadoly.
Birikken Ulttar Uıymy Nıgerııanyń soltústik-shyǵysyndaǵy terrorıster belsendi áreket etetin shtattarda 600 myńnan astam balanyń ashtyq qaýpine ushyraǵanyn jáne aldaǵy 6 aıda azyq-túlikke shuǵyl qol jetkize almasa, olardyń ólip ketýi múmkin ekenin habarlady.
Nıgerııa úkimeti men BUU ókilderiniń birlesken málimdemesinde soltústik-shyǵystaǵy Borno, Adamava jáne Iobe (BAY) shtattarynda terrorısterdiń áreketterine baılanysty gýmanıtarlyq daǵdarystyń ýshyǵyp ketkeni aıtylǵan.
Osy aqparatqa sáıkes, maýsym aıynda bastalatyn qurǵaq maýsymda Borno, Adamava jáne Iobe shtattarynda 4,6 mıllıon adam azyq-túliktiń jedel tapshylyǵyn bastan keshedi, óz kezeginde bul altynshy jyl qatarynan aımaqtaǵy aýyr gýmanıtarlyq jaǵdaıdy týyndatady.
Sonymen qatar, Nıgerııanyń gýmanıtarlyq máseleler jáne kedeılikpen kúres mınıstri Nentave Goshve Iılvatda men BUU-nyń Nıgerııadaǵy gýmanıtarlyq máseleler jáne rezıdentter isteri jónindegi úılestirýshisi Mohamed Foll Abýdja astanasynda ótken sharada «Nıgerııaǵa arnalǵan 2025 jylǵy qurǵaq maýsymǵa qarsy áreket josparyn» tanystyrdy.
Sharada sóılegen sózinde mınıstr Iılvatda aldaǵy ýaqytta Borno, Adamava nemese Iobe shtattarynda eshbir balanyń ash jatpaıtynyna ýáde etti.
— Bul jospar tek qurylymdar men strategııalar týraly emes. Bul Borno, Adamava nemese Iobe shtattarynda eshbir balanyń ash jatpaýy, eshbir ananyń emdeletin aýrýdan balasyn joǵaltpaýy jáne qaqtyǵys pen kedeıliktiń saldarynan adamdyq qadir-qasıet zardap shekpeýi týraly ýáde, — dedi ol.
BUU úılestirýshisi Foll bul máselege baılanysty pikir bildirip, halyqaralyq uıymdardy qoldaý kórsetýge shaqyrdy.
— Gýmanıtarlyq kómekke qaýip tónip tur. Yntymaqtastyq álsirep barady, al resýrstardyń jetispeýshiligi mıllıondaǵan adamdardy, ásirese balalardy, qaýipke ushyratyp jatyr, — dep atap ótti Foll.
Osyǵan deıin Nıgerııa azyq-túlik qaýipsizdigine tóngen qaterge baılanysty tótenshe jaǵdaı jarııalanǵany belgili boldy.