BUU-da ál-Farabıdiń izgilikti qoǵam ıdeıasyna negizdelgen JOO úlgisi usynyldy
Ál-Farabı atyndaǵy QazUÝ-dyń rektory, akademık Ǵalym Mutanov Nıý-Iorkte BUU shtab-páterinde ótken jahandyq azamattyq máselelerge arnalǵan halyqaralyq konferentsııada osyndaı jobany usyndy.
«Rýhanı jańǵyrý» baǵdarlamasynyń sheńberinde BUU alańyndaǵy bundaı joǵary deńgeıdegi is-sharanyń bastamashysy jetekshi qazaqstandyq joǵary oqý orny ál-Farabı atyndaǵy QazUÝ boldy. Konferentsııany uıymdastyrýshylar qataryna sondaı-aq BUU Órkenıetter Alıansy men QR-dyń BUU janyndaǵy ókildigi kiredi.
Іs-sharany asha otyryp, BUU Órkenıetter alıansynyń Joǵarǵy ókili Nassır Abdýlazız ál-Naser ásirese jas urpaqtyń arasynda ǵalamdyq azamattyqty qalyptastyrýǵa arnalǵan konferentsııanyń mańyzdylyǵyn atap ótip, bul protseste ýnıversıtetterdiń atqarar róli úlken ekendigin jáne osy baǵytta jańa tásilderdi tabý qajettigin alǵa tartty.
Ál-Farabı atyndaǵy QazUÝ-dyń rektory, akademık Ǵalym Mutanovtyń Shyǵystyń uly fılosofy ál-Farabıdiń izgilikti qoǵam týraly ıdeıalaryna negizdelgen ýnıversıtet 4.0 atty joǵary oqý oryndaryn damytýdyń jańa úlgisin usynǵan baıandamasy konferentsııa qatysýshylarynyń úlken qyzyǵýshylyǵy men jandy pikirlerin týdyrdy.
Model tórt quramdas bólikti biriktiredi: bilim berý, zertteý, ınnovatsııalyq-kásipkerlik jáne rýhanı-adamgershilik. Bul modeldi júzege asyrýda «Bolashaqqa baǵdar: rýhanı jańǵyrý» atty memlekettik baǵdarlama naqty nusqaý bolyp tabylady.
Jańa býyn ýnıversıtetiniń mıssııasy jastardy rýhanı jáne adamgershilik qasıetteri joǵary jáne belsendi azamattyq ustanymy bar álemniń izgilikti azamattary retinde qalyptastyrýǵa baǵyttalǵan. Jańa trend - ýnıversıtet 4.0 jahandaný jáne jańa tehnologııalardyń qarqyndy damýy jaǵdaıynda aıryqsha mańyzdy. BUU Órkenıetter alıansynyń qaramaǵynda álemniń joǵary oqý oryndaryn gýmanıtarlaý úshin modeldik jospar ázirleý jónindegi QazUÝ-dyń usynysy konferentsııa qatysýshylary tarapynan maquldanyp, qoldaý tapty.
«Biz modeldik jospar týraly usynysty ýaqtyly dep sanaımyz. Álemniń ýnıversıtetteri jastardy gýmanıstik qundylyqtar rýhynda tárbıeleý úshin naqty qadamdar jasaýǵa birigýi kerek. Bul BUU-nyń «Jahandyq azamattyq» baǵdarlamasynyń maqsattaryna sáıkes keledi. Bul turǵyda BUU-nyń «Akademııalyq yqpal» baǵdarlamasynyń ǵalamdyq haby - QazUÝ-dyń tájirıbesi men bastamalary ásirese ózekti ári suranysqa ıe. Al ál-Farabıdiń murasy kúni búginge deıin aqyl men júrekti biriktirip baıytatyn túbegeıli óńdeý kúshine ıe bilimniń úlgisi bolyp tabylady» - dep atap ótti Alıanstyń Joǵarǵy ókili NassırAbdýlazız ál-Naser.
Aıta keterlik jaıt, QazUÝ BUU Órkenıetter Alıansymen birlesip «Іzgilikti qoǵamnyń azamattaryn qalyptastyrý. Qazirgi zamanǵy ýnıversıtetterdiń mıssııasy» atty halyqaralyq jobany júzege asyrýda.
Ýnıversıtet 4.0 úlgisi aıasynda QazUÝ-da ınnovatsııalyq-tehnologııalyq jáne rýhanı-adamgershilik tuǵyrnama úndestigine negizdelgen «Al-Farabi university smar tcity» atty biregeı joba sátti júzege asýda. Sondaı-aq BUU Bas Assambleıasynyń 66-sessııasynda Qazaqstan Prezıdenti usynǵan «Jasyl kópir» bastamasyn iske asyrýǵa baǵyttalǵan «RIO +20» BUU konferentsııasynda alǵa tartylǵan «Jasyl kópir urpaqtan - urpaqqa» jobasy júzege asyrylýda.
Halyqaralyq konferentsııaǵa BUU-dyń janyndaǵy Qazaqstannyń Turaqty ókili Qaırat Omarov, QR Mádenıet jáne sport mınıstrligi, ár túrli elderdiń dıplomatııalyq mıssııalary, úkimettik emes uıymdardyń ókilderi jáne AQSh pen álemniń aldyńǵy qatarly ýnıversıtetteriniń ǵylymı elıtasy qatysty.
