BUU basshysy Qazaqstan Prezıdentine alǵys bildirdi

NЬıÝ-IORK. QazAqparat - BUU Bas Assambleıasynyń 76-sessııasyna qatysý sheńberinde QR Premer-Mınıstriniń orynbasary – Syrtqy ister mınıstri Muhtar Tileýberdi BUU Bas hatshysy Antonıý Gýterrıshpen kezdesti. Antonıý Gýterrısh Aýǵanstanǵa járdemdesý jónindegi BUU mıssııasynyń qashyqtaǵy keńsesin Almatyda ornalastyrý týraly sheshim qabyldaǵany úshin Qazaqstan Prezıdentine alǵysyn bildirdi. Bul týraly QazAqparat SІM silteme jasap habarlaıdy.

Ol bizdiń elimiz turaqtylyqtyń sımvoly jáne kópjaqtylyqty ustanýdyń úlgisi bolyp tabylatynyn erekshe atap ótti.

«Qazaqstannyń bul sheshimin biz tek kómek retinde qana baǵalamaımyz. Siz BUU men Qazaqstan arasyndaǵy tamasha qarym-qatynastardy odan ári damytýǵa yqpal etetin dıplomatııalyq baýyrlastyqtyń shynaıy rýhyn kórsettińiz», - dedi A.Gýterrısh. Óz kezeginde Mınıstr Prezıdent Q.Toqaevtyń BUU-nyń Bıologııalyq qaýipsizdik jónindegi halyqaralyq agenttigin qurý jónindegi bastamasynyń iske asyrylý barysy týraly egjeı-tegjeıli habardar etti.

Sol kúni Mınıstr BUU Bas hatshysynyń orynbasary - Kontrterrorıstik basqarma basshysy Vladımır Voronkovpen kelissózder júrgizdi. Qazaqstandyq tarap Aýǵanstandaǵy terrorıstik qaýip-qaterlerge qarsy is-qımyl boıynsha olardyń áleýetin nyǵaıtý úshin Ortalyq Azııa óńiri elderine tehnıkalyq járdemdesý baǵdarlamalary týraly habardar etildi.

BUU Bas hatshysynyń saıası máseleler jáne álem qurylysy jónindegi orynbasary Rozmarı Dıkarlomen kezdesýde jahandyq jáne óńirlik qaýipsizdikti qamtamasyz etý jónindegi sharalar men birlesken kúsh-jiger talqylandy.

M.Tileýberdi BUU Bas Hatshysynyń qarýsyzdaný máseleleri jónindegi orynbasary Izýmı Nakamıtsý jáne Jahandyq kommýnıkatsııalar jónindegi orynbasary Melıssa Flemıngpen birge BUU shtab-páterinde Semeı ıadrolyq synaq polıgonynyń tarıhı jabylýy týraly turaqty ekspozıtsııanyń ashylýyna qatysyp, Prezıdent N.Nazarbaevtyń polıgondy 1991 jylǵy 29 tamyzdaǵy Jarlyǵynyń kóshirmesin syıǵa tartty.

Sonymen qatar, Qazaqstannyń syrtqy saıası vedomstvosynyń basshysy Fılıppın Syrtqy ister mınıstri Teodoro Loksın jáne Kıprdiń Syrtqy ister mınıstri Nıkos Krıstodýlıdespen kezdesip, sondaı-aq beınekonferentsbaılanys rejıminde AQSh-tyń USAID Halyqaralyq damý agenttiginiń ákimshisi Samanta Paýermen kelissózder júrgizdi.