BUU basshysy Brazılııadaǵy órtke baılanysty alańdaýshylyq bildirdi

NUR-SULTAN. QazAqparat – BUU Bas hatshysy Antonıý Gýterrısh Amazonııadaǵy jaǵdaıdy únemi qadaǵalap otyrǵandyǵyn jáne alapat órttiń  ǵalamsharǵa tıgizer teris saldaryna alańdaýly ekendigin málimdedi, dep habarlaıdy QazAqparat  BUU saıtyna silteme jasap.

«Orman kúlli álemniń densaýlyǵy úshin óte mańyzdy. Halyqaralyq qaýymdastyq tek Amazonkadaǵy ǵana emes, Kongo men Indonezııa basseınindegi orman alabynyń mańyzdy ekenin moıyndaıdy. Osy orman aýmaqtary adamzattyń densaýlyǵynda mańyzdy oryn alady»,-dep atap ótti baspasóz hatshysy Stefan Dıýjarık. 

Brazılııa ǵarysh agenttiginiń deregine sáıkes, bıyl Amazonııa tropıkalyq ormandaryndaǵy órttiń sany rekordtyq deńgeıge jetken. Ásirese, Brazılııadaǵy Roraıma, Akrı, Rondonııa, Amazonas jáne Matý-Grosý-dý-Sýl shtattary qatty zardap shegip otyr.

Brazılııa ulttyq ǵarysh zertteý ınstıtýtynyń spýtnıktik derekteri kórsetip otyrǵandaı, órttiń sany byltyrǵydan 85% artqan.

Resmı málimetterge sáıkes, Brazılııada 2019 jyldyń segiz aıynda 75 myń orman órti shyqsa, bul kórsetkish 2018 jyly 39 759 bolǵan.

Órtten eldiń soltústigi qatty zardap shekti. Atap aıtqanda, órt sany soltústik Roraımada 141%, Akrı batys shtatynda - 138%, Rondonııa batys shtatynda - 115%, soltústik-batystaǵy Amazonas shtatynda 81% kóbeıgen.

Brazılııanyń iri shtattarynyń biri Amazonasta tótenshe jaǵdaı jarııalandy. Ońtústik-batystaǵy Matý-Grosý-dý-Sýl shtatynda órt kólemi 114% artqan.