BUU Bas Assambleıasy Semeı óńirin saýyqtyrý maqsatyndaǵy qarardy qabyldady
Bul týraly QazAqparat QR Syrtqy ister mınıstrliginiń resmı saıtyna silteme jasap habarlaıdy.
Qujatta Halyqaralyq qaýymdastyqqa Qazaqstanǵa zardap shekken halyqty emdeý jónindegi arnaıy baǵdarlamalardy ázirleýge jáne júzege asyrýǵa, Semeı óńirindegi ekonomıkalyq ósý men ornyqty damýdy qamtamasyz etý jónindegi kúsh-jigerge kómek kórsetýge shaqyrý jazylǵan. Atalmysh qujatta Qazaqstan Úkimetiniń Semeı óńiriniń qajettilikterin qanaǵattandyrýǵa járdemdesý úshin resýrstar bólýdegi mańyzdy róli tanylady.
Halyqaralyq Qaýymdastyq ókilderiniń rekordtyq sany Qazaqstan halqymen yntymaq bildirdi – BUU-ǵa múshe 118 memleket qarar jobasynyń teń avtorlary boldy. Qazaqstan Respýblıkasynyń Syrtqy ister mınıstrligi qarardyń teń avtorlary retinde, BUU-ǵa múshe memleketterge óz alǵysyn bildiredi.
Bul qarardy BUU onynshy ret qabyldady. Ol alǵash ret 1998 jyly BUU Bas Assambleıasynyń 52-sessııasynda maquldanǵan. Semeı óńiri boıynsha qabyldanǵan qarar halyqaralyq qoǵamdastyqtyń adamdardyń, ásirese balalardyń jáne basqa da osal toptardyń ómiri men densaýlyǵy úshin ıadrolyq synaqtar saldarynyń uzaq merzimdi sıpatyna Qazaqstannyń eleýli alańdaýshylyǵyn moıyndaýynyń aıqyn bir dáleli.
QR Tuńǵysh Prezıdenti - Elbasy Nursultan Nazarbaevtyń Jarlyǵymen Qazaqstan 1991 jyly álemdegi eń iri ıadrolyq polıgon – Semeı synaq polıgonyn japty, onda 1949 jyldan 1989 jylǵa deıin 458 atmosferalyq jáne jerasty jarylystary synaqtan ótkizilgen. Osy ıadrolyq synaqtardan zardap shekken aımaq 300 000 sharshy shaqyrymnan asady, al zardaptardyń aýqymy asa qaıǵyly.
Mıllıonnan astam adam bul synaqtardyń qurbany boldy. Radıatsııa onda turatyn adamdardyń ımmýndyq júıesin álsiretti. Keıinnen onkologııalyq aýrýlardyń kórsetkishteri artyp, emdeý quny men aýrýlardyń uzaqtyǵy artty. ıAdrolyq synaqtardyń zııandy áseri urpaqtan-urpaqqa berilip keledi.
Qazaqstan halyqaralyq qoǵamdastyqtyń, sonyń ishinde BUU men donor elderdiń kómegimen ıadrolyq tragedııanyń teris saldarymen úsh onjyldyq boıy kúres júrgizip keledi.
Qarardyń birlesken avtorlarynyń tizimi: Avstralııa, Aýstrııa, Ázerbaıjan, Aljır, Argentına, Armenııa, Aýǵanstan, Bangladesh, Bahreın, Belarýs, Belız, Benın, Bolgarııa, Bolıvııa, Býrkına-Faso, Býtan, Ulybrıtanııa, Venesýela, Shyǵys Tımor, Vetnam, Gaıtı, Gana, Gvatemala, Gvıneıa, Gvıneıa-Bısaý, Germanııa, Gondýras, Grekııa, Grýzııa, Domınıkan Respýblıkasy, Zımbabve, Izraıl, Úndistan, Indonezııa, Iordanııa, Irak, Iran, Ispanııa, Italııa, Kambodja, Kamerýn, Kanada, Qatar, Kenııa, Kırıbatı, Kolýmbııa, Kot-d'Ivýar, Kosta-Rıka, Kýveıt, Qyrǵyz Respýblıkasy, Kýba, Laos, Latvııa, Lesoto, Lıvan, Lıvııa, Mavrıtanııa, Majarstan, Malavı, Malaızııa, Maldıv, Marokko, Marshall araldary, Mıkronezııa, Moldova, Monako, Mońǵolııa, Mıanma, Naýrý, Nepal, Nıgerııa, Nıkaragýa, Koreıa Respýblıkasy, Nıger Respýblıkasy, Rýanda, Rýmynııa, BAÁ, Oman, Pákistan, Palaý, Paragvaı, Perý, Polsha, Salvador, San-Tome jáne Prınsıpı, Saýd Arabııasy, Senegal, Sent-Vınsent jáne Grenadınder, Sıngapýr, Sırııa, Solomon araldary, Sýdan, Pákistan, Sýrınam, AQSh, Tájikstan, Taıland, Togo, Tonga, Tývalý, Týnıs, Túrkııa, Túrikmenstan, Ózbekstan, Ýganda, Fıdjı, Fılıppın, Frantsııa, Ortalyq Afrıka Respýblıkasy, Chad, Shvetsııa, Ekvador, Ekvatorlyq Gvıneıa, Erıtreıa, Efıopııa, Ońtústik Afrıka, ıAmaıka, Japonııa.
